Məşhur müğənninin onu narkoman adlandıran sayt əməkdaşları ilə məhkəmə çəkişməsi niyə təxirə düşüb?

Müğənni Mətanət İsgəndərlinin jurnalistlərlə məhkəmə prosesi hələ davam edir. Belə ki, bir neçə ay öncə müğənni aznews.az xəbər portalının baş redaktoru Elçin Zahiroğlunu və portalın əməkdaşı İntiqam (Valehoğlu) Əliyevi məhkəməyə verib. Səbəb isə "Aznews.az" saytında barəsində gedən yazıdakı "narkoman" ifadəsidir.
Qeyd edək ki, M.İsgəndərli Nərimanov rayon Məhkəməsinə xüsusi ittiham qaydasında müraciət edərək hər iki jurnalistin böhtana görə (Cinayət Məcəlləsi. maddə 147.1) cinayət məsuliyyətinə cəlb olunmasını tələb edib.
Hazırda durumun nə yerdə olmasını xəbər almaq üçün hər iki tərəflə əlaqə saxladıq.

E.Zahiroğlu hələ ciddi bir irəliləyişin olmadığını bildirərək bunları söylədi:

"Məhkəmə davam edir. Növbəti proses iyulun 21-də keçiriləcək. Ötən məhkəmədə biz həmin informasiyanı yazmaqda qərəzimizin olmadığını sübut edən materiallar təqdim etdik. Həmin materiallara münasibəti Mətanət İsgəndərlinin özü bildirməliydi. O isə məhkəmədə iştirak etmirdi. Ona görə də hakim prosesi təxirə saldı. Növbəti məhkəmə prosesində müğənninin özünün də iştirakının lazımlığını bildirdi".

Növbəti məhkəmə prosesində M.İsgəndərlinin iştirak edib-etməyəcəyini xəbər almaq üçün müğnni ilə əlaqə saxlamaq istədik. Telefona bacısı Təranə İsgəndərli cavab verdi. O, M.İsgəndərlinin istirahətdə olduğunu bildirdi. Təranə xanım bizim sualımıza cavab verə bilməyəcəyini dedi.

Musavat.com