Ana səhifə Toplum |
Azərbaycan Respublikasının Prezidenti yanında Bilik Fondu layihələrə start verir.
Bilik Fondunun informasiya təminatı sektorundan Axar.az-a daxil olan məlumatda bildirilir ki, Fondun ilk layihəsi "Dini abidələrdə tarixin izləri" adlanır. Layihə çərçivəsində Azərbaycan ərazisində yerləşən məscidlər, ziyarətgahlar, kilsələr, sinaqoqlar, məbədlər və imamzadələrdə tarixi-elmi tədqiqatlar aparılacaq, abidələr hərtərəfli öyrəniləcək, eləcə də Azərbaycan tarixi üçün faydalı məqamlar üzə çıxarılacaq, ehtiyac olduqda müəyyən bərpa işləri aparılacaq.
Layihənin həyata keçirələcəyi ilk məkan Bərdə İmamzadəsi olacaq.
Fondun "Dini abidələrdə tarixin izləri" layihəsinə Azərbaycan Milli Elmlər Akademiyasının müvafiq qurumları da cəlb olunacaq.
Layihənin əsas məqsədi Azərbaycan və Qafqazın digər bölgələrində yaşayan əhalinin maarifləndirlməsi, ziyarətgahlar barədə düzgün elmi, tarixi, dini biliklərin verilməsi, milli-dini dəyərlərimizin qorunub saxlanması və gələcək nəsillərə ötürülməsidir.
Yaxın gələcəkdə Bilik Fondu müxtəlif istiqamətlərdə layihələr həyata keçirməyi planlaşdırır. Hazırda "Ustad və şəyird", "Azərbaycan elmi bu gün xaricdə", "Dünya elmi bu gün Azərbaycanda", "Docendo discimus", "Fondun xarici nümayəndəliklərinin yaradılması", "Epizodlar", "Auditoriya +", "Qardaşlaşmış məktəblər" layihələrinə hazırlıq prosesi gedir.
Tarix
2014.08.07 / 15:35
|
Müəllif
Axar.az
|