3 saylı istintaq təcridxanasında saxlanılan Ömər Məmmədov ölkə Prezidentinə, Mətbuat Şurasına və Vətəndaş Həmrəyliyi Partiyasının rəhbərliyinə müraciət ünvanlayıb.

Axar.az-a Ədliyyə Nazirliyi Penitensiar Xidmətin rəsmi saytına istinadən Ö.Məmmədovun müraciətini təqdim edir:

"Azərbaycan Respublikasının Prezidenti cənab İlham Əliyevə

Cənab Prezident hörmətli İlham Heydər oğlu Əliyev!

Mən cinayət əməlinə görə həbs edilərək 3 saylı istintaq təcridxanasında saxlanılıram. Həbs olunan günədək ali təhsil alırdım, təhsilimi davam etdirmək, valideynlərimin yaşlı olmasını, özümün gənc olmağımı, gələcəkdə respublikamızın layiqli vətəndaşı kimi təhsilimi başa çatdırmağımı nəzərə alaraq Sizdən xahiş edirəm ki, məni əfv edəsiniz.

Əvvəlcədən öz adımdan və ailəmin adından Sizə təşəkkür bildirirəm.

08.10.2014-cü il

Məmmədov Ömər Elyar oğlu"

"Azərbaycan Respublikasının Mətbuat Şurasına

Surəti: Vətəndaş Həmrəylik Partiyasının sədri Sabir Rüstəmxanlıya

Müraciət

Yazaraq sizə bildirirəm ki, bu gün mən Respublikamızın Prezidenti cənab İlham Əliyevə əfv olunmağım barədə ərizə ünvanlamışam. Bu ərizəni və yazdığım müraciəti özüm yazmışam və bu, mənim öz fikrimdir. Əlavə olaraq da VHP rəhbərliyindən xahiş edirəm ki, məni üzv olduğum partiyadan bu günkü gündən çıxardasız.

Müraciəti özüm yazdım, düzgünlüyünü imzamla təsdiq edirəm.

Ömər Məmmədov Elyar oğlu

08.10.2014-cü il"