Azərbaycan Milli Elmlər Akademiyasının (AMEA) vitse-prezidenti İsa Həbibbəyli Trend-ə bildirib ki, özəl elmi müəssisələrin yaradılması "Elm haqqında" qanun layihəsində öz əksini tapıb.

Akademiya rəsmisinin sözlərinə görə, bu gün ölkədə AMEA-dan başqa da elmi-analitik fəaliyyətlə məşğul olan QHT-lər, cəmiyyətlər, qruplar, mərkəzlər var.

Vitse-prezident hesab edir ki, özəl elmi müəssisələrin yaradılması onlara meydan yaratmaq üçündür.
Milli Məclisin Elm və təhsil komitəsinin üzvi, professor Musa Qasımlı isə Trend-ə bildirib ki, "Elm haqqında" qanun layihəsinə görə, elmi fəaliyyətin subyektləri arasında olan ictimai təşkilatlar, digər hüquqi şəxslər özəl, fərdi və qarışıq mülkiyyət münasibətinə malik olmaqla fəaliyyət göstərə bilərlər. Elmi fəaliyyətin subyektləri arasında dövlət mülkiyyəti olan orqanlar da var.

M.Qasımlı əlavə edib ki, təşkilati-hüquqi forması və mülkiyyət növünə görə elmi müəssisə və təşkilatlar dövlət, bələdiyyə, özəl və ictimai (qeyri-dövlət) elmi müəssisə və təşkilatlar kimi fəaliyyət göstərə bilər: "Elmi fəaliyyətlə yalnız elm adamları məşğul olacaqlar. Onun təşkili ilə məşğul olan qeyri-dövlət elmi müəssisə və təşkilatları həm ictimai təsisat kimi fəaliyyət göstərən hüquqi şəxs, həm də kommersiya hüquqi şəxs ola bilər".
Milli Məclis üzvü sözügedən layihənin qəbulundan sonra Azərbaycanın elmində yeni keyfiyyət mərhələsinin başlayacağını söyləyib.

Qeyd edək ki, "Elm haqqında" qanun layihəsinin Milli Məclisin payız sessiyasında müzakirəsi nəzərdə tutulub.