6 aprel tarixindən 7 aprel tarixinə keçən gecədən etibarən Binəqədi rayonu, Biləcəri qəsəbəsi Yəhyə Hüseynov küçəsinin bir hissəsində hərəkət məhdudlaşdırılacaq.

Bu barədə Axar.az-a Azərbaycan Avtomobil Yolları Dövlət Agentliyinin mətbuat katibi Anar Nəcəfli məlumat verib.

O bildirib ki, məhdudiyyət aparılan təmir işləri ilə əlaqədardır.

Hərəkətin məhdudlaşdırılması sözügedən küçənin Xurşidbanu Natavan küçəsi ilə kəsişməyədək (300 N-li orta məktəb) olan hissəsində tətbiq ediləcək və 7 aprel tarixində axşam saatlarınadək qüvvədə olacaq.

Qeyd edək ki, təmirlə əlaqədar 4 aprel gecəsi də bu yola məhdudiyyət tətbiq edilmişdi.