4 saylı Cəzaçəkmə Müəssisəsində Lamiyə Quliyevanın ana olması ilə bağlı xəbərlərə xanım millət vəkilləri də reaksiya verib.


Deputat Kamilə Əliyeva "Sia.az"a bildirib ki, bu cür məlumatların mediada işıqlandırılmasının tamamilə əleyhinədir:

"Təəssüf ki, mətbuatda bu cür xəbərlərə də yer verilir. Kütləvi informasiya vasitələrində belə əxlaqa zidd xəbərlərin yayımlanmasına son qoyulmalıdır".

Deputat Məlahət İbrahimqızı isə hesab edir ki, bu, hüquq mühafizə orqanlarının işidir:

"Araşdırılıb təhqiqat aparılacaq. Bununla bağlı hər hansı cinayət işi varsa, sözsüz ki, reaksiya veriləcək. Ancaq Azərbaycan mentalitetinə yaraşmayan belə məsələlərin, həmçinin heç bir fakt olmadan mətbuatda yayılmasını düzgün saymıram. KİV-də hər cür informasiya yayıla bilər. Lakin əndazədən çıxmış formada müzakirə edilməsi yanlışdır".

Qeyd edək ki, L.Quliyeva Şəmkirin keçmiş icra başçısı Aslan Aslanovun oğlunu öldürdüyü üçün 2003-cü ilin mayında həbs edilib. Məhkəmənin hökmü ilə 10 il müddətinə azadlıqdan məhrum edilib. L.Quliyevanın həbs müddəti başa çatsa da, azadlığa buraxılmayıb. Buna səbəb kimi isə onun müəssisədə qanunları pozması və daha 5,6 il cəza almasıdır.