Yanvarın 23-də Gədəbəy rayonunda 11 yaşlı oğlan intihar edib.

Bu barədə Gədəbəy rayon prokurorunun köməkçisi Anar Nağıyev ANS-ə məlumat verib. Onun sözlərinə görə, rayonun Arabaçı kəndində 2004-cü il təvəllüdlü Şahin Gülzalı oğlu Abbasov özünü asıb.

Məlumat daxil olan kimi hadisə yerinə hüquq-mühafizə orqanlarının əməkdaşları cəlb olunub. Meyit tibbi ekspertizadan keçirilib. Hazırda baş verən intiharın səbəbləri dəqiqləşdirilir.

Hadisə ilə əlaqədar bildirilib ki, uşaq orta məktəbdə müəllim tərəfindən döyülüb. Onu, sinif rəhbəri Rübail Tofiq oğlu Nəbiyev döyüb.

Ehtimal olunur ki, məktəbdə şagirdlərin gözü qarşısında müəllim tərəfindən kobud rəftarla üzləşən uşaq bu səbəbdən özünü asıb. Lakin rayon prokurorluğundan faktla bağlı heç bir məlumat verilməyib.

"Rübail Nəbiyev intihar edən Şahin Abbasovun sinif rəhbəri olduğu üçün dindirilib. Hazırda istintaq aparılır. İstintaq sirri olduğu üçün bəzi detalları açıqlaya bilmərik", - deyə Anar Nağıyev bildirib.

Faktı ilə bağlı rayon prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə iş başlanılıb.

Məsələ ilə bağlı Təhsil Nazirliyində də araşdırmalara başlanılıb. Nazirliyin mətbuat xidmətindən verilən məlumata görə, araşdırmalardan sonra hadisənin əsas səbəbləri məlum olacaq.

Bu barədə məktəbin direktoru Tofiq Mirzəyev isə açıqlamasında bildirib ki, intihar deyildiyi kimi məktəbdə yaranmış problem səbəbindən olmayıb.

"Ümumiyyətlə, deyilənlərin hamısı bizim məktəbə qarşı yönələn qara qüvvələrin işidir. Şahin Abbasovun məktəbdə heç bir problemi olmayıb. Davamiyyəti yaxşı olub. Bacardığı qədər müəllimlərin tapşırıqlarını yerinə yetirməyə çalışıb. Ondan heç kəs narazılıq etməyib. Hadisə baş verən günün səhəri sinifə girib, uşaqlarla bir-bir danışmışam. Uşaqlar da bildiriblər ki, sinif rəhbəri heç kəsi incitməyib".

İntihar edən şagirdin sinif rəhbəri Rübail Nəbiyev barəsində deyilənlərin heç birinin həqiqəti əks etdirmədiyini bildirib.

Qeyd edək ki, intiharla bağlı araşdırmalar davam edir