105 saylı Tovuz seçki dairəsindən deputatlığa namizəd Qənirə Paşayeva bu gün Tovuzun böyük kəndlərindən olan İbrahim Hacılı kəndində görüşlər keçirib.

Axar.az xəbər verir ki, məhəllə-məhəllə, ev-ev görüşlərini davam etdirən Qənirə Paşayeva deputatlığı dövlətə və seçicilərinə daha çox xidmət etmək üçün bir vasitə gördüyünü xatırladıb.

Q.paşayeva 14 illik deputat fəaliyyətinə toxunub və gücü daxilində seçicilərinin yanında olduğunu, müraciətlərinin həllini tapması üçün çalışdığını bildirib:

“Əgər mənə təkrar etimad göstərsəniz, bundan sonra da sizi layiq olduğunuz səviyyədə təmsil etməyə çalışacağam”.

Tovuzun son illər ərzində çox ciddi problemlərinin böyük bir hissəsinin həllini tapdığını söyləyən Qənirə Paşayeva qeyd edib ki, dövlətimiz nə qədər güclənərsə, problemlərin həlli də o qədər sürətlənər:

“Ona görə də bizim hər birimiz ölkəmizdə sabitliyin qorunub saxlanılması, ölkəmizin daha da inkişaf etməsi istiqamətində birlikdə daha yüksək səylə çalışmağa davam etməliyik”.

Q.Paşayeva ölkəmizin keçdiyi yoldan, əldə etdiyi uğurlardan, regionda və dünyada son illər baş verən proseslərdən, cənab Prezident İlham Əliyevin rəhbərliyi ilə dövlət tərəfindən həyata keçirilmiş böyük işlərdən danışıb və seçicilərlə fikir mübadiləsi aparıb.

Q.Paşayeva kənddə olan bəzi problemlərlə bağlı fikirləri də dinləyib. Q.Paşayeva həmçinin kənddə yaşayan bir sıra şəhid ailələri, müharibə veteranları və fiziki imkanları məhdud insanları evlərində ziyarət edib.

İbrahim Hacılı seçiciləri bildiriblər ki, Qənirə Paşayevaya etimadları tamdır, çünki o, 14 illik deputatlıq fəaliyyəti zamanı daim kənd sakinləri ilə görüşlər keçirib, ailələri, xəstələri ziyarət edib, gənclərlə önəmli müzakirələr aparıb və hər zaman onların müraciətlərinə, problemlərinə, təkliflərinə həssaslıqla yanaşıb və onların həlli istiqamətində əlindən gələn dəstəyi əsirgəməyib. Eyni zamanda, Milli Məclisdə, beynəlxalq platformalarda onları layiqli şəkildə təmsil edib.

Qənirə Paşayeva ona “biz öz millət vəkilimiz kimi sizi neçə il əvvəl seçmişik və 9 fevralda da gedib sizə öz dəstəyimizi bir daha göstərəcəyik və inanırıq ki, siz bundan sonra bizim səsimiz olmaqda davam edəcəksiniz” deyən sakinlərin hər birinə təşəkkür edib.