İsmayıllıda film kimi qətlin yeni təfərrüatı açılır.

Axar.az-ın hadisə ilə bağlı yazdıqları təsdiqlənməkdədir. Belə ki, Qurban Əfəndi kəndində 64 yaşlı kişinin 56 yaşlı arvadını və 62 yaşlı qonşusunu öldürməsi məhz sonuncunun nakam məhəbbətinə görə olubmuş.

Musavat.com-un əməkdaşı cinayəti törədən Məhəmməd Əhmədovun ailəsi ilə görüşüb. Bahar Əhmədova ilə ailəli olan Məhəmmədin ondan 5 uşağı var. Onların dördü ailəlidir. Kiçik oğlu nişanlıdır.

Qonşusu Allahverdi Rəhimov da gəncliyində Baharı sevib. Ancaq sonunda qızı Məhəmməd alıb: "Valideynləri Allahverdiyə vermədilər qızı... O vaxtdan on illər keçib. İndiyədək bu ailələr arasında heç bir problem yaşanmayıb".

Məhəmmədin oğlu: "Deyilənlərin hamısı əsassızdır. Atamın qısqanclığı da əsassız olub. O ölən də qonşumuz idi. 4-5 il idi ki, atamın səhhətində problem var idi, özündən çıxırdı. Başı çönürdü kişinin, ruhi problemləri vardı".

Hadisənin bir müddət əvvəl digər qonşunun toyundan sonra törədildiyi bildirilir. Kişi məktubunda son olaraq, həmin toyda arvadı ilə qonşu kişinin hərəkətlərindən şühbələndiyini yazıb:

"Bu da əsassızdır. Qadın toy olan qonşuda yemək bişirib. Qonşu qonşu ilə salamlaşar da, söhbət də edər. Kişinin dedikləri onun yanlış fikirləridir, beyininə dolub. Qadının heç bir günahı olmayıb, elə o biri adamın da..."

Həm oğlu, həm bacısı, həm də digərləri məktubda yazılanların həqiqəti əks etdirmədiyini vurğulayırlar: "Yazdığı şübhələridir, hamısı da əsassızdır. Gündəlik yazıb özü üçün..."