Ana səhifə Toplum |
Pandemiya dövründə bütün ölkələrdə operativ qərargahlar yaradılıb. Həmin ölkələr Qərargahın qəbul etdiyi qərarlara riayət etməkdədirlər. Biz də Nazirlər Kabineti yanında Operativ Qərargahın qəbul etdiyi qanunlara riayət etməyə məcburuq.
Bunu Axar.az-a açıqlamasında Qafqaz Müsəlmanları İdarəsinin (QMİ) Fitva şöbəsinin mütəxəssisi Ağasəid Yaqubov deyib. QMİ-nin mütəxəssisi bildirib ki, İmam Hüseyn əleyihissəlamın mərasimlərini qeyd eləmək inanclı kəsimin ürəyindən gələn bir istəkdir:
“Hamımız istəyirik ki, İmam Hüseyn əleyihissəlamın mərasimləri keçirilsin. Hətta sovet dövründə belə bu mərasimlər gizli olaraq baş tutub. Amma pandemiyadır, insanların sağlamlığının qorunması üçün məscidlər bağlanıb. On gün ərzində insanların bir araya gəlməsi məscidləri xəstəliklərin episentrinə çevirə bilər. Xəstəliyin geniş miqyas almasından söhbət gedir. Ona görə də İmam Hüseyn məclislərini keçirən digər ölkələr də bu mərasimləri təxirə salıb”.
Ağasəid Yaqubov bildirib ki, bütün inanclı insanlar qayda-qanunlara riayət etməlidirlər:
“Allah-təala buyurur ki, bir yerdə təhlükə varsa, bilərəkdən özünüzü həmin təhlükəyə atmayın. Dinimiz də insanların sağlamlığını qorumaq üçün həmişə tövsiyələr verir. Bu nöqteyi-nəzərdən, Qafqaz Müsəlmanları İdarəsi də Məhərrəmliklə bağlı fitva vermədi. Çünki hazırkı duruma görə bütün göstərişləri Operativ Qərargah verir”.
QMİ rəsmisi deyib ki, Aşura günü qan vermək istəyən insanlar xəstəxanalara yaxınlaşa bilərlər:
“Qanvermədən öncə onlardan analiz götürüləcək. Axı hər kəsdən qan götürülmür. Hər kəs fərdi şəkildə, könüllü olaraq qan vermək üçün səhiyyə ocaqlarına, qan banklarına yaxınlaşa bilər. Ən azından qeydiyyata durmaq olar ki, sabah qan lazım olanda gedib qan versinlər”.
Tarix
2020.08.15 / 14:14
|
Müəllif
Tural Turan
|