11:16

Paytaxtın Binəqədi rayonu, "Azadlıq prospekti" metro stansiyası yaxınlığında hündürmərtəbəli yaşayış binasında dəhşətli yanğın baş verib.

Axar.az-ın hadisə yerində olan əməkdaşı xəbər verir ki, yanğın yaşayış binasının 3-cü mərtəbəsindən başlayıb.

Fövqəladə Hallar Nazirliyinin yanğınsöndürmə briqadası hadisə yerinə gəlib.

Hazırda yanğının qarşısının alınması istiqamətində işlər aparılır.

***

Azadlıq prospektinin yanğına yaxın olan hissəsi bağlanıb. Sakinlərin əməkdaşımıza verdiyi məlumata görə, binada sakin var, FHN əməkdaşları xilasetmə işləri aparır.

Yanğın Azadlıq prospekti 36 ünvanındakı göydələndədir. Bir anda başlayan və sürətlə bütün binanı saran yanğından xilas olmaq üçün sakinlərdən bəziləri 2-3-cü mərtəbədən atılıblar.

Xəsarət alan yoxdur.

***

Fövqəladə Hallar Nazirliyi (FHN) Binəqədi rayonunda yaşayış binasında baş verən yanğınla bağlı rəsmi məlumat yayıb.

Nazirlikdən Axar.az-a verilən məlumata görə, Fövqəladə Hallar Nazirliyinin "112" qaynar telefon xəttinə, Bakı şəhəri, Binəqədi rayonunda yaşayış binasında yanğın olması barədə məlumat daxil olub.

Dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvə və texnikası hadisə yerinə cəlb olunub və aidiyyəti qurumlar məlumatlandırılıb. Yanğının söndürülməsi davam edir. Əlavə məlumat veriləcək.