"Qatarlar boşaldıldıqdan sonra içəridə sərnişin qalıb-qalmadığını yoxlamaq üçün bizim əməkdaşlar və platformadakı polislər vaqona baxış keçirib".

Bu barədə Axar.az-a Metropolitendə qatarların boşaldılaraq yoxlanılıb yola salınmasına aydınlıq gətirərkən "Bakı Metropoliteni" QSC-nin mətbuat xidmətinin rəhbəri Nəsimi Paşayev məlumat verib:

"43 saylı marşrut "Həzi Aslanov" – "Dərnəgül" istiqamətində hərəkətdə olarkən nasazlıq yarandığı üçün qatar Depoya göndərilib. "Qara Qarayev" stansiyasında sərnişinlər boşaldılıb və qatar birbaşa Depoya gedib. Depoya göndəriləcək qatarda sərnişinlərin olması mümkün deyil. Qatar boş olmalıdır. Ona görə də stansiyada sərnişinlər boşaldılıb. Qatarlar boşaldıldıqdan sonra içəridə sərnişin qalıb-qalmadığını yoxlamaq üçün bizim əməkdaşlar və platformadakı polislər vaqona baxış keçirib. Narahatlığa heç bir əsas yoxdur".

Qeyd edək ki, metronun "Qara Qarayev" stansiyasında sərnişinlər qatardan çıxarılıb. Polislər vaqonlara daxil olaraq yoxlanışa başlayıblar. Yoxlama başa çatdıqdan sonra qatar boş yola salınıb.

Daha sonra növbəti qatarda yoxlanışlar təkrarlanıb. Həmin qatar da yoxlama başa çatandan sonra boş vəziyyətdə yola salınıb. Yoxlama prosesi 15 dəqiqə davam edib.