Bakının küçə və prospektlərində "yaşıl dalğa"nın tətbiq olunmasına başlanılıb.

Axar.az Nəqliyyat Nazirliyi Nəqliyyatı İntellektual İdarəetmə Mərkəzinin saytına istinadən xəbər verir ki, yeni tədris ilinin başlanması ilə əlaqədar "yaşıl dalğa" tətbiq ediləcək.

Tədris ilinin başlaması ilə yollarda nəqliyyat vasitələrinin və piyadaların sıxlığının artacağı ehtimal edildiyi üçün svetoforların vaxt planları yenilənir və pik saatlarına uyğun qurulur.

NİİM-in mətbuat xidmətinin rəhəbəri Şəfa Mehmanqızı qeyd edib ki, bu məsələdə avtomobillərin küçə və prospektlərdən keçməsi sayının artımı da nəzərə alınır. Avtomobillərin hərəkət intensivliyinə dair statistik məlumatlar çıxarıldıqdan sonra əsas yollarda "yaşıl dalğa"ların sayı artırılır:

"Yəni nəqliyyat vasitələrinin dayanmaması üçün yol boyu ardıcıl olaraq bir neçə svetoforda yaşıl işıq yandırılır. Artıq bu işlərin tətbiqinə başlanılıb. Bundan başqa, paytaxtdakı təhsil müəssisələrinin yerləşdiyi ərazilər müəyyən olunub və "yaşıl dalğa"lar daha çox məhz orada tətbiq olunur. Çünki bu ərazilərdə avtomobillərin sayı həddindən artıq çox olur. Ona görə də avtomobillərin dayanmaması, sıxlığın və tıxacların yaranmaması üçün "yaşıl dalğa" əmri daha çox bu yerlərdə tətbiq olunacaq".