Azəryolservis ASC ödənişsiz dayanacaqların təşkili məqsədi ilə tikinti işləri aparır.

ASC-dən Axar.az-a verilən məlumata görə, Bakı-Quba-Rusiya sərhədi avtomobil yolunun 17-ci kilometrliyində və "VAZ yol qovşağı" adlanan sahədə duracaq tikilir.

Həmçinin Bakı-Ələt-Qazax-Gürcüstan dövlət sərhədi avtomobil yolunun 15-ci kilometrliyində də ikinci belə duracaq inşa edilir.

Birinci ödənişsiz duracağa giriş-çıxışı təmin etmək məqsədi ilə ASC tərəfindən 280 metr uzunluğunda və 12 metr enində yeni yol tikilib.

Bununla da qovşaqla dayanacağa nəqliyyat vasitələrinin rahat və maneəsiz şəkildə gediş-gəlişi təmin olunub.

İkinci duracağa isə giriş-çıxış məqsədilə uzunluğu 700 metr, eni 8 metr olan sürətli keçid zolağı tikilib.

Burada avtobusların dayanması üçün tikilən "cib"likdə 130 paqon metr səki daşı da düzülüb. "Lökbatan dairəsi" istiqamətindən gələn nəqliyyat vasitələrinin geriyə dönmələri üçün ayrıcı zolaqdan yol verilib.