ATV kanalının efirin bayağı verilişlərdən təmizlənməsində ciddi mövqe tutduğu hiss olunur. Biz artıq kanal rəhbərliyinin reytinq dalınca qaçmamağını özlərinə birmənalı şəkildə məqsəd qoyduğunu müşahidə edirik.

Bu sözləri Axar.az-a açıqlamasında Milli Televiziya və Radio Şurasının Monitorinq şöbəsinin müdiri Təvəkkül Dadaşov deyib. Onun sözlərinə görə, artıq bəzi kanallar efirin sağlamlaşmasına ciddi şəkildə maraq göstərir:

"ATV kanalının efirində az-çox nöqsanlar var ki, onlar da aradan qaldırılacaq. Əsas odur ki, kanal efirin sağlamlaşdırılmasına meyillidir və efirin kübarlaşması istiqamətində addımlar atır.

Ümumilikdə isə MTRŞ bütün kanallara eyni məsafədən baxır. Təbii ki, qoyulan tələblərə riayət olunması məsələsində müəyyən fərqlər var. "Speys", "Lider" artıq efirində ciddi düzəlişlər edib. Burada bayağı verilişlərin yayımında müəyyən dəyişiklər edildi. Əsas olan odur ki, kanallar efirin təmizliyinin, sağlamlığının təmin olunmasında istəkli olsunlar. Ümumilikdə vəziyyət normala doğru gedir. Başlanmış işlər kompleks işlərdir. Efirin daha baxımlı səviyyəli olmasına çalışırıq".

Şöbə müdiri bildirib ki, əsas məqsəd Azərbaycan tamaşıçısının Türkiyə, Rusiya kanallarına olan asılılığını aradan qaldırmaq, yerli kanallara olan meyilini artırmaqdan ibarətdir.