Əgər bir xəbər portalı və yaxud da hər hansı jurnalist tanınmış şəxsin yalandan ölüm xəbərini yayırsa, həmin şəxs məsuliyyətə cəlb oluna bilər.

Bu sözləri Axar.az-a tanınmış jurnalist Zeynal Məmmədli ölkə mediasında məşhur sənətçilər, müğənni və aktyorlar haqqında qəsdən ölüm xəbərinin yayılmasına münasibət bildirərkən deyib.

Ekspertin fikrincə, bəzi saytlar sadəcə reklam gəlirlərini artırmaq üçün bu cür rezonans doğuran xəbərlər verir, süni yolla İP toplamağa çalışırlar:

"Ən asan yol budur ki, məşhur insanların ölüm xəbərini yayıb, sonradan xəbəri təkzib edirlər. Diqqət çəkmək üçün sanki bir anlıq ehtiyacını ödəyirsən. Strateji baxımdan bu, heç bir uğur gətirmir, amma statistik baxımdan günün məşhuruna çevrilirsən, sənin xəbərin bir çox yerdə yayılır. Əgər bir xəbər portalı və yaxud da hər hansı jurnalist tanınmış şəxsin yalandan ölüm xəbərini yayırsa, həmin şəxs məsuliyyətə cəlb oluna bilər. Yalan məlumata, dəyən maddi və mənəvi ziyana görə, həmin məşhur məhkəməyə müraciət edə bilər. Ümumiyyətlə, bu cür yalan xəbərlərin ictimai önəmi yoxdur".

Jurnalistikanı karikaturaya çeviriblər

AMEA-nın Nəsimi adına Dilçilik İnstitutunun şöbə müdiri, əməkdar jurnalist Qulu Məhərrəmli isə qəsdən ölüm xəbərlərini yayan media orqanlarını qeyri-peşəkar və məsuliyyətsiz hesab edir:

"İstənilən xəbər ən azı iki mənbədən dəqiqləşdirilməlidir. Hər hansı məşhurun ölüm xəbəri isə ən azı 4-5 mənbədən dəqiq öyrənilib, yazılmalıdır. Bir çox mənbələrdən - təcili yardım, xəstəxana, dostlar, qohumlar və ailə üzvlərindən bu xəbərin yalan, yaxud doğru olduğunu öyrənmək olar. Son zamanlar isə məşhurların ölüm xəbəri hədsiz dərəcədə çox yayılıb. Bu həmin insana qarşı mənəvi terror deməkdir. Mən həmin kəslərə jurnalist demirəm. Çünki jurnalistikanın əlifbasıdır ki, verdiyin məlumatı mütləq şəkildə və fərqli mənbələrdən dəqiqləşdirməlisən. Bunun bircə adı var. O da məsuliyyətsizlikdir. Bəzən bir sayt da digər həmkarlarının yazdığına güvənir və zəng edib məlumatı dəqiqləşdirmir. Nəticədə xəbər tirajlanır, uğursuz sensasiya yaranır. Bu, ümumilikdə jurnalistikanı, işlədiyin yeri gözdən salmaq deməkdir. Bu cür yazılar bəzən sifarişli, bəzən qeyri-peşəkarlıqdan, bəzən isə düşmənçilikdən yaranır. Jurnalistikanı karikaturaya çeviriblər. Çünki hər hansı bir jurnalist görkəmli şəxsin öldüyünü yazırsa, ancaq əslində o adam ölməyibsə, o nə etməlidir? Gedib həmin jurnalisti məhkəməyə verməlidir. Hesab edirəm ki, reytinq, gündəmi ələ almaq məqsədilə belə xəbərləri yazan jurnalist işdən azad edilməlidir".

"Səhv eləmişik, üzr istəyirik"

Bir neçə ay əvvəl növbəti dəfə ölüm xəbəri yayılan əməkdar artist Baloğlan Əşrəfov da məsələyə münasibət bildirib. Müğənni ölüm xəbəri yayıldığı zaman ailəsinin böyük sarsıntı keçirdiyini deyib:

"Belə xəbərlərin yayılmasına artıq öyrəşmişəm. Sadəcə, yalandan kiminsə ölüm xəbərini yazanlara Allah insaf versin. Elə ləyaqətsiz insanları məhkəməyə verib təzminat almaq lazımdır. Ancaq mən elin pulu ilə dolanan adamam, necə xalqın övladını, öz həmvətənimi məhkəməyə verim?! Özümə sığışdırmıram. Düzü, o adamın qanında, canında ləyaqət olmalıdır. O qədər yalandan kiminsə öldüyünü yazırlar ki, belə xəbəri oxuyanda inanmıram, zəng edib dəqiqləşdirirəm. Mediaya qarşı bu qədər güvənsizlik yaratmaq nəyə lazımdır? Zəng edirsən ki, ay bala, niyə məni sağ ikən öldürmüsən, yalandan ölüm xəbərimi yaymısan?. Deyirlər ki, səhv eləmişik, üzr istəyirik. Sonuncu dəfə anamı görməyə kəndə gedirdim. Qapıdan içəri girəndə zəng gəldi ki, sənin haqqında bu cür yazıblar. Ailəm çox narahat olmuşdu, özüm əməliyyat keçirən insanam, qəfil verilən xəbərlər mənə pis təsir edir. Görəsən, bu cür xəbər yazıb süni şou yaradan insanlar heçmi utanmırlar?!."

Xatırladaq ki, bu günə kimi İlhamə Quliyeva, Rəmiş, Röya Ayxan, Nanə Ağamalıyeva kimi məşhurların ölüm xəbəri yayılıb.