"Gözləyirik ki, çap olunsun. Hər dəfə zəng eləyəndə deyirlər ki, bugün-sabah, bugün-sabah… Keçən ildən belə deyirlər, artıq təzə il başlayıb".

Bu sözləri Orfoqrafiya lüğətinin çapının illərlə ləngiməsi ilə bağlı "Axar.az"ın sualını cavablandıran Dilçilik İnstitutunun Orfoqrafiya şöbəsinin müdiri İsmayıl Məmmədov dedi.

İsmayıl müəllim Orfoqrafiya lüğətinin bir aya çap olunacağı barədə vəd aldığını söylədi:

"Orfoqrafiya lüğəti yaxın vaxtda, təxminən, bir aya çıxmalıdır. Mən də artıq redaktor kimi oxuyub düzəltmişəm, qol çəkib "Şərq-Qərb" nəşriyyatına göndərmişəm. Gözləyirik ki, çap olunsun. Hər dəfə zəng eləyəndə deyirlər ki, bugün-sabah, bugün-sabah. Keçən ilin axırlarından belə deyirlər, artıq təzə il də başlayıb. Lakin onu deyim ki, lüğət çıxanda 2013-cü il adıyla nəşr olunacaq".

Xatırladaq ki, sonuncu Orfoqrafiya lüğəti 2004-cü ildə dərc olunub. Hərçənd ki, Dövlət Dili haqqında qanunun 13-cü maddəsinə görə, müvafiq icra hakimiyyəti orqanı 5 ildə bir dəfədən az olmayaraq yazı dili normalarını təsbit edən lüğətin (orfoqrafiya lüğətinin) nəşr olunmasını təmin etməlidir.

Bu qədər gecikmənin səbəbini İsmayıl Məmmədov qısaca belə izah etdi:

"Kitabın gecikməsinin səbəbi bizlik deyil, yuxarılıqdır".

Hüquqi məsuliyyət nəzərdə tutulmayıb

Məsələnin hüquqi tərəfini öyrənmək üçün hüquqşünas Elçin Ağayevlə əlaqə saxladıq. O, bu məsələ ilə bağlı hüquqi məsuliyyətin nəzərdə tutulmadığını vurğuladı:

"Bununla bağlı olaraq hər hansı hüquqi məsuliyyət – inzibati və yaxid digər - nəzərdə tutulmayıb. Məsuliyyət də Dilçilik İnstitutuna nəzarət edən orqanın üzərində qalır".

Açıqlama vermək səlahiyyətində deyilik

"Şərq-Qərb" mətbəəsindən isə məsələylə əlaqədar məlumat verə bilməyəcəklərini, onların belə hüquqa malik olmadıqlarını vurğuladılar:

"Belə suallara cavab vermək haqqımız yoxdur. Bu barədə yalnız sifariş verənə məlumat verə bilərik".