Efir məkanında müəyyən zorakılıq səhnələrini, eləcə də bəzi erotik elementləri özündə daşıyan cizgi filmlərinin yayımına rast gəlinib.

Bu sözləri Axar.az-a danışan MTRŞ Aparatı Ekspertiza, proqramlaşdırma və analitik şöbəsinin müdiri Təvəkkül Dadaşov deyib.

Onun sözlərinə görə, hazırda monitorinq şöbəsi bu mövzuda ciddi araşdırmalar aparır:

"Bu mövzuda Milli Televiziya və Radio Şurasının (MTRŞ) qəbul etdiyi qaydalar var. Qaydalara görə, uşaqların və yetkinlik yaşına çatmayan şəxslərin inkişafına ziyan vura biləcək proqramlar göstərilmə vaxtı məhdudlaşdırılmış proqramlar adlandırılır. Bu baxımdan MTRŞ efir məkanında yayımlanan cizgi filmlərinə ciddi nəzarət edir. Hansı telekanalda yayımlanan cizgi filmlərinin tərkibində zorakılıq və yaxud erotik tərkibli hallar olarsa, həmin telekanala qarşı müəyyən tədbirlər həyata keçiriləcək".

Monitorinq şöbəsinin rəhbəri son vaxtlar efir məkanında cizgi filmlərinin yayımı zamanı ciddi qüsurların olmadığını da bildirdi:

"Ümumilikdə nəzər salanda son vaxtlar bu cür halların azaldığını müşahidə edirik. Hazırda Monitorinq şöbəsi cizgi filmlərinin yayımına ciddi şəkildə nəzarət edir".

Qeyd edək ki, qanunda televiziya kanallarında uşaq verilişləri ilə bağlı kvota yoxdur.