Düşünürəm ki, dövlət müəssisələrinin özəlləşdirilməsi vətəndaşlar üçün birmənalı olaraq faydalı olacaq.

Bu sözləri Axar.az-a hüquqşünas Ələsgər Məmmədli deyib.

Onun sözlərinə görə, bu qərar büdcənin üzərində olan izafi xərclərin azalmasına səbəb olacaq:

"Dövlət tibb müəssisələrinin əhəmiyyətli bir hissəsinin özəlləşdirilməsi büdcədə əlavə vergi yığımına səbəb olacaq. Bu təklifə əsasən, daha az xərclə, daha keyfiyyətli fəaliyyət göstərmək mümkündür. Düşünürəm ki, bu, şişirdirilmiş xərclərin maksimum azalmasına səbəb olacaq".

Ekspert dövlət tibb müəssisələrinin özəlləşdirilməsinin mənfi tərəflərindən də danışıb:

"Dövlət tibb müəssisələrinin özəlləşdirilməsi zamanı monopoliyanın yaranmasına diqqət etmək lazımdır. Əgər belə olarsa, bu, böyük fəsadlar yarada bilər. Bunun yaranmaması üçün özəl tibb müəssisələrinə vahid qiymət tərtib etmək lazımdır".

Xatırladaq ki, Azərbaycan Respublikası baş nazirinin müavini, Yeni Azərbaycan Partiyasının sədr müavini, icra katibi Əli Əhmədov Trend-ə müsahibəsində ölkədə dövlət tibb müəssisələrinin əhəmiyyətli bir hissəsinin özəlləşdirilə biləcəyini deyib.