Ana səhifə Toplum |
Azərbaycan Texniki Universitetinin (ATU) professoru, Prezident təqaüdçüsü Ayaz Kəngərli vəfat edib.
Report-un xəbərinə görə, A.Kəngərli universitetin Maşın və mexanizmlər nəzəriyyəsi kafedrasında çalışıb.
Qeyd edək ki, A.Kəngərli 1930-cu ildə Naxçıvan şəhərində anadan olub. 1947-ci ildə Naxçıvan şəhər 1 saylı orta məktəbi qızıl medalla, 1952-ci ildə Azərbaycan Politexnik İnstitutunun Mexanika fakültəsini fərqlənmə diplomu ilə bitirib, avtomobil üzrə mühəndis-mexanik ixtisası alıb.
1952-1956-cı illərdə Azərbaycan Respublikası Avtonəqliyyat Nazirliyinin avtomobil bazalarında işləyib.
1957-ci ilin fevral ayında Azərbaycan Politexnik İnstitutu Maşın detalları kafedrasının assistenti vəzifəsinə qəbul edilib, 1960-cı ildə həmin kafedranın baş müəllimi, 1970-ci ildən dosenti, 1990-cı ildə Maşın və mexanizmlər kafedrasının professoru seçilib.
A.Kəngərli 1969-cu ildə neft maşınlarının dinamikasına aid namizədlik dissertasiyası müdafiə edib, 1972-ci ildə dosent, 1990-cı ildə professor elmi adını alıb.
A.Kəngərli Maşın və mexanizmlər nəzəriyyəsi kafedrasının yaradıcısıdır, 1970-1982 və 2003-2013-cü illərdə ona rəhbərlik edib. Həmin illərdə kafedranın laboratoriya bazası yaradılıb, kurs layihələrinin mövzuları və yerinə yetirilmə qaydaları müasir səviyyəyə yüksəldilib.
1978-1983-cü illərdə Avtonəqliyyat fakültəsinin dekanı, 1994-1999-cu illərdə Universitetin prorektoru vəzifələrində işləyib.
102 elmi, metodik və tədris əsərlərinin, o cümlədən 2 dərsliyin, 1 dərs, çoxlu sayda metodik vəsaitin, iki ixtiranın müəllifidir. Onun hazırladığı çoxlu sayda işləyən mexanizmlərin animasiyaları "maşın və mexanizmlər nəzəriyyəsi" fənnindən aparılan mühazirələrdə istifadə olunur. A.Kəngərlinin rəhbərliyi ilə 3 aspirant texnika elmləri namizədi alimlik dərəcəsi almaq üçün dissertasiya yazıb müdafiə ediblər.
O, respublika, ümumittifaq və beynəlxalq konfranslar və müşavirələrdə çıxışlar edib.
Tarix
2016.01.13 / 11:12
|
Müəllif
Axar.az
|