11:52

Bərdə rayonunda evdən qaçan 14 yaşlı qız tapılıb.

Bu barədə onun valideynləri ANS-ə məlumat veriblər. Valideynlər bildiriblər ki, ötən gündə evdən çıxan qız Bakıya bibisigilə gedib:

"Qızım paytaxta çatandan sonra bibisinə zəng edib və Bakıda olduğunu deyib. Aynurə hazırda bacımın evindədir. Evdən qaçmasına səbəb kimi isə dəcəllik etdiyi üçün müəllim tərəfindən döyüldüyünü göstərir", - qızın atası Şakir Əsgərov deyib.

Xatırladaq ki, şəhərin Sənaye küçəsində qeydiyyatda olan 2002-ci il təvəllüdlü Aynurə Şakir qızı Əsgərova ötən gün günorta saat 15 radələrində ailə üzvlərinin evdə olmamasından istifadə edərək, heç kimə xəbər vermədən evdən getmişdi.

Atası bildirmişdi ki, Aynurə məktəbdə müəllimi ilə narazılıq yaradıb və müəllimi onun bu hərəkətini valideynlərinə deyəcəyi ilə hədələyib: "Düşünürəm ki, qızım məndən qorxduğu üçün evdən qaçıb. O, evdən çıxaraq rayon avtovağzalına gedib və oradan da Bakıya yollanıb. Bizim paytaxtda qohumlarımız var. Ancaq Aynurə onların heç birinin ünvanını tanımır. Hazırda Bərdə polisi də hər yerdə qızımı axtarır".