Azərbaycan əsilli türk teatr sənətçisi Roza İbadova Kocamaz Xocalı soyqırımının unudulmaması və gələcək nəsillərə doğru şəkildə çatdırılması məqsədilə Türkiyənin üç mühüm şəhərində keçirilən anım tədbirlərinin aparıcısı olub.

Axar.az xəbər verir ki, İzmir, Manisa və Turqutluda təşkil edilən bu tədbirlərdə Xocalıda baş verən insanlıq faciəsi alimlərin, sənətçilərin və tarixçilərin iştirakı ilə geniş auditoriyaya çatdırılıb.

Xüsusilə İzmirin Qarabağlar və Bornova rayonlarında keçirilən anım proqramları daha geniş olub.

Roza İbadova Kocamaz həmçinin Xocalı soyqırımının səhnələşdirilməsinə də bu il nail olub.

Teatrın təsirli dili ilə Xocalıda baş verənləri səhnədə yenidən canlandıran Kocamaz tamaşaçıları 1992-ci ilin soyuq fevral gecəsinə apararaq, həmin qorxunc gecəni hiss etdirməyi bacarıb. Tamaşanın dramaturgiyası, səhnə tərtibatı və emosional dərinliyi tamaşaçılar tərəfindən böyük rəğbətlə qarşılanıb və Azərbaycanın yaşadığı bu faciənin unudulmaması üçün güclü bir mesaj verib.

O, Azərbaycan Mədəniyyət Dərnəyi tərəfindən Turqutluda təşkil edilən "Türk dünyası, Azərbaycan və Xocalı soyqırımı" mövzusundakı paneldə də iştirak edib və sənətin, teatrın tarixi unutdurmamaq üçün daşıdığı missiyadan danışıb.