Bakı ŞİH-in rəhbəri Eldar Əzizov deyir ki, 2 ildən sonra Bakının su-kanalizasiya sistemi düzələcək.

Axar.az xəbər verir ki, bu barədə siyasətçi Natiq Cəfərli qeyd edib.

“1. Bakı Şəhəri İcra Hakimiyyətinin su və kanalizasiya sisteminə nə aidiyyəti var? Eldar müəllim zəng edib, İri Şəhərlərin Birləşmiş Su Təchizatı Xidmətinə əmr, göstəriş verə bilərmi ki, flan yerdə flan işi görün?

2. BŞİH Azərbaycan Avtomobil Yolları Dövlət Agentliyinə əmr verə, onları tunellərin yenidən qurulmasına məcbur edə bilərmi?

3. BŞİH Bakı şəhərinin təsərrüfatı, infrastrukturu ilə məşğul olan 14-ə yaxın mərkəzi hökumət-dövlət orqanına göstəriş verə bilərmi?

4. BŞİH-nin səlahiyyəti məhduddursa, şəhər təsərrüfatı bir mərkəzdən idarə olunmursa, Eldar Əzizov nəyə əsasən 2 ilə problemi həll edəcəyini söyləyir?” – o bildirib.

Ekspert əlavə edib ki, Bakı şəhəri vahid, seçilmiş mərkəzdən idarə olunmalı, səlahiyyət və məsuliyyət bir mərkəzdə toplanmalıdır:

“Bunun üçün Bakı Böyükşəhər Bələdiyyəsi yaradılmalı, mer vəzifəsi təsis olunmalı, seçki yolu ilə şəhərin başçısı və hökuməti müəyyən edilməlidir”.