Maliyyə Nazirliyi tərəfindən növbəti depozit hərracı keçirilib.

Axar.az xəbər verir ki, bu barədə Maliyyə Nazirliyi məlumat yayıb.

Bildirilib ki, 24 aprel 2025-ci il tarixində Azərbaycan Respublikası Maliyyə Nazirliyi tərəfindən dövlət büdcəsi vəsaitlərinin daha səmərəli idarə olunması məqsədilə vahid xəzinə hesabının milli valyutada olan sərbəst qalığının yerli banklarda depozitə yerləşdirilməsi üçün növbəti depozit hərracı təşkil edilib.

Hərracın nəticələrinə əsasən, vahid xəzinə hesabının 500,0 milyon manat həcmində sərbəst qalığı kapitallaşma və aktivlərinin məbləği səviyyəsinə görə ölkənin ən iri beş bankında 32 gün müddətinə, 7.04% orta çəkili faiz dərəcəsi ilə depozitə yerləşdirilib.

Qeyd edək ki, bundan əvvəl Maliyyə Nazirliyi ilk dəfə depozit hərracı keçirmiş və vahid xəzinə hesabının milli valyutada olan 1 milyardlıq sərbəst qalığını 3 ay müddətinə 7,21% olmaqla 4 sistem əhəmiyyətli banka yerləşdirmişdi.