08:23

Fövqəladə Hallar Nazirliyinin (FHN) qaynar telefon xəttinə Sabirabad rayonunun Muğan Gəncəli kəndində fərdi yaşayış evində yanğın olması barədə ilkin məlumat daxil olub.

Axar.az xəbər verir ki, məlumatla əlaqədar FHN-in müvafiq xilasetmə qüvvələri yanğın yerinə cəlb olunublar.

İlkin məlumata əsasən, yanğın ikimərtəbəli fərdi yaşayış evində baş verib.

Yanğının kəşfiyyatı zamanı 4 nəfərin meyiti aşkar olunub.

Yanğın söndürülüb, ətrafda olan tikililər yanğından mühafizə olunub.

***

Sabirabad rayonunun Muğan Gəncəli kəndində evdə baş verən yanğında ölənlərin adları məlum olub.

Hadisə nəticəsində 1989-cu il təvəllüdlü Tural Ağasəf oğlu İmanov, həyat yoldaşı, 2002-ci il təvəllüdlü Safalı Qorxmaz qızı İmanova, övladları 2020-ci il təvəllüdlü Osmanbəy Tural oğlu İmansoy və 2024-cü il təvəllüdlü Esma Tural qızı İmansoy ölüb.

Hadisə ilə bağlı araşdırma aparılır.

***

Sabirabad rayonunun Muğan Gəncəli kəndində evdə bir ailənin 4 üzvünün ölümü ilə nəticələnən dəhşətli yanğının bəzi təfərrüatı məlum olub.

Muğan Gəncəli kənd inzibati ərazi dairəsi üzrə nümayəndəliyindən Teleqraf-a bildirilib ki, hadisə zamanı mərhum Tural Ağasəf oğlu İmanovun anası və qardaşı da evdə olub.

Onlar vaxtında xilas ola biliblər. T.İmanov və ailəsinin qaldığı otağın pəncərəsi olmadığı üçün onları xilas etmək mümkün olmayıb. Qonşuların evin döşəməsini sökərək ailəni xilas etmək cəhdi nəticəsiz qalıb.