Dövlət İmtahan Mərkəzi (DİM) I və IV ixtisas qrupları (o cümlədən III qrup üzrə DT və TC altqruplarının hər ikisini seçənlər üçün coğrafiya fənni) üzrə 13 iyul 2025-ci il tarixində keçirilmiş qəbul imtahanının nəticəsini elan edib.

Axar.az xəbər verir ki, bu imtahanda I ixtisas qrupu üzrə ən yüksək nəticəni (400 bal) 2 nəfər – Neftçala rayonu Qədimkənd kənd orta məktəbinin məzunu Müşfiq Aqil oğlu Əlili və Bakı şəhəri 64 saylı orta məktəbin məzunu Əbülhəsən Brilyant oğlu Məmmədov göstərib.

Müşfiq Aqil oğlu Əlili hər iki mərhələnin cəminə görə I ixtisas qrupu üzrə ən yüksək nəticəni (698.3 bal) göstərən abituriyentdir. O, imtahanın birinci mərhələsində 298.3 bal toplayıb. Əbülhəsən Brilyant oğlu isə Məmmədov imtahanın birinci mərhələsində 296.7 bal toplayıb.

Bu imtahanda IV ixtisas qrupu üzrə ən yüksək nəticəni (400 bal) 4 nəfər – Bakı şəhəri 272 saylı orta məktəbin məzunu Sona Məhəmməd qızı Nurməmmədli, Şəki rayonu Orta Zəyzid kənd 1 saylı orta məktəbin məzunu Orxan Fəxri oğlu Abdulsəmədli, Bakı şəhəri 253 saylı orta məktəbin məzunu Məryəm İlqar qızı Abdullayeva, Bakı şəhəri 53 saylı orta məktəbin məzunu Zeynəb Zaur qızı Ağaməmmədova göstərib. Nurməmmədli Sona Məhəmməd qızı və Abdulsəmədli Orxan Fəxri oğlu hər iki mərhələnin cəminə görə IV ixtisas qrupu üzrə maksimum nəticəni (700 bal) göstərən abituriyentlərdir. Onlar imtahanın birinci mərhələsində 300 bal toplayıblar. Məryəm İlqar qızı Abdullayeva imtahanın birinci mərhələsində 289, Zeynəb Zaur qızı Ağaməmmədova isə 286.7 bal toplayıb.

Xatırladaq ki, imtahanın I mərhələsində maksimum 300, II mərhələsində isə 400 bal toplamaq mümkündür. Müsabiqə hər iki mərhələdə toplanılan balların cəminə görə aparılır.