Bu gün Azərbaycan Respublikasının Konstitusiya Günüdür.

1918-1920-ci illərdə mövcud olmuş ilk demokratik cümhuriyyətimiz - Azərbaycan Xalq Cümhuriyyəti dövlət qanununu qəbul etməyə nail ola bilmədi. Bu səbəbdən Azərbaycan Respublikasının Konstitusiya tarixi Sovet dövrünə təsadüf edir. Azərbaycanın birinci Konstitusiyası 1921-ci il mayın 19-da I Ümumazərbaycan Sovetlər Qurultayında qəbul edilib. Azərbaycan SSR Konstitusiyası 1921-ci ildə Rusiya Konstitusiyasına uyğunlaşdırılıb, 1925-ci il martın 14-də IV Ümumazərbaycan Sovetlər Qurultayında qəbul edilib.

1921-ci il Azərbaycan SSR-in Konstitusiyasından sonra respublikamızda baş verən ictimai siyasi dəyişikliklər nəticə etibarilə 1927 və 1937ci ildə yeni Konstitusiyaların qəbulunu zəruri edib. Sovet dönəmində sonuncu – 4-cü Konstitusiya 1978-ci ildə səsverməyə çıxarılıb.

Müstəqil dövlətimizin Konstitusiyası

Azərbaycan 1991-ci il oktyabrın 18-də Müstəqilliyin Bərpası Haqqında Konstitusiya Aktını qəbul etsə də, yalnız 1995-ci il noyabrın 12-də ümumxalq referendumu ilə Müstəqil Azərbaycanın ilk Konstitusiyası qəbul olunub, noyabrın 27-dən qüvvəyə minib. Azərbaycan Konstitusiyası 5 bölmədən, 12 fəsildən və 158 maddədən ibarətdir. 2002-ci il avqustun 24-də və 2009-cu il martın 18-də keçirilən referendumlarda Konstitusiyaya əlavə və dəyişikliklər edilib.