Bu gündən başlayaraq Çexiyanın Praqa şəhərində keçirilən Avropa Olimpiya Komitəsinin 44-cü Baş Assambleyası çəçivəsində rəsmi səfərdə olan Gənclər və İdman naziri Azad Rəhimov Çexiyanın Təhsil, Gənclər və İdman naziri xanım Katerina Volaxova ilə görüşüb.

Gənclər və İdman Nazirliyindən Axar.az-a verilən məlumata görə, Çexiya parlamentinin binasında baş tutan görüşdə hər iki nazir öz ölkələrinin idman və gənclər siyasəti, bu sahələrdə həyata keçirilən layihələr haqda danışıblar. Nazirlər bu istiqamətdə əməkdaşlığın daha da möhkəmlənməsinin önəmini vurğulayıblar.

Nazir Katerina Volaxova görüş çərçivəsində xüsusi olaraq Avropa Birliyinin təsis etdiyi Vişeqrad Sazişi və Şərq Tərəfdaşlığı Proqramı çərçivəsində ölkəmizin fəaliyyətini yüksək qiymətləndirdiyini bildirib və əməkdaşlıq üçün Azərbaycana təşəkkür edib.

Görüşün sonunda nazir Azad Rəhimov və Katerina Volaxova daha sıx əməkdaşlıq istiqamətində yeni layihələrin işlənib hazırlanmasının zərurətini vurğulayıblar.