3 il 7 aydır davam edən Rusiya-Ukrayna müharibəsində indiki güc balansı məsələsi bir çox insanda suallar doğurur.

Axar.az xəbər verir ki, bu sözləri politoloq Kamran Cəfərov qeyd edib.

O bildirib ki, burada ən vacib məsələ tendensiyalardır və onları görmək üçün iki əsas sahədən son xəbərləri qeyd etməliyik - iqtisadi və hərbi:

“24 sentyabrda Rusiya Maliyyə Nazirliyi ƏDV-ni 20%-dən 22%-ə qaldıracağını elan etdi. Bu qərar bütün sahələri əhatə edəcək və nəticə etibarı ilə mağazadaki bütün mallar, bütün xidmətlər bahalaşacaq. Əgər bu günə qədər Rusiya müharibə nəticəsində büdcədə yaranan defisiti Milli Rifah Fondundan (bu fonda uzun illər ərzində neft-qaz satışından pullar yığılırdı) bağlaya bilirdisə, indi artıq bunu edə bilmir və ƏDV-ni qaldırmaq məcburiyyətindədir. ƏDV-nin 2% qaldırılması Rusiya büdcəsinə əlavə təxminən 12.5 milyard dollar gətirəcək. Rusiya iqtisadiyyatının durumu o yerdədir ki, cəmi 12.5 milyard dollara görə ƏDV-ni qaldırmağa məcburdur.

Ukrayna iqtisadiyyatına gəlincə, uzun rəqəmlərə və statistikaya ehtiyac yoxdur, bircə fakt vəziyyəti izah edir: sentyabr ayında avqust ayı ilə nisbətdə qızıl-valyuta rezervləri 7%, 2022-ci ilə nisbətdə isə 50%-dən çox artdı. O boyda işğala, təcavüzə məruz qalan ölkənin iqtisadiyyatı nəinki çökmədi, hətta aydan-aya rezervləri artır (təbii ki, Qərb müttəfiqlərinin sayəsində)”.

Politoloqun fikrincə, hərbi sahədə də ciddi faktlar var:

“Yəqin ki, Zelenskinin gecə-gündüz Qərb ölkələrindən silahlar istəməsi hər kəsin yadındadır. Rusiya təbliğatı Zelenskini “dilənçi” adlandırırdı. Təbii ki, müharibə gedişində Qərbin Ukraynaya silah yardımlarından əlavə silah istehsalı zavodları tikilirdi, texnilogiyalar verilirdi, ən aparıcı mütəxəssilər gətirilirdi və s.

İndi isə maraqlı xəbər - 29 sentyabrda Ukraynada silah ixracı (!!!) strategiyası təqdim olunacaq. Yəni, Ukrayna artıq dünyaya, özünə lazım olmayan silahların satışına başlayır. Bilirsiniz əsasən hansı silahlardan söhbət gedir? Sualtı dronlardan və tank əleyhinə silahlardan. Niyə tank əleyhinə silahlar USQ tərəfindən az istifadə olunur? Rusiyada qalan tankların sayına baxanda bu sual ritorik kimi səslənir.

İndi təsəvvür edin ki, 4 ilə yaxın o boyda təcavüzə məruz qalan ölkə artıq silah ixracına başlayır”.