ABŞ-ın vitse-prezidenti Ceyms Devid Vensin Cənubi Qafqaza planlaşdırılan səfəri region üçün mühüm siyasi və strateji məqamlarla müşayiət olunur.

Bu sözləri Axar.az-a açıqlamasında siyasi ekspert Samir Hümbətov Vensin Azərbaycana səfəri ilə bağlı danışarkən deyib.

Onun sözlərinə görə, bu səfər bir neçə əsas istiqamətdə ciddi proseslərin aktivləşməsinə səbəb ola bilər:

“Diqqət mərkəzində duran əsas məsələlərdən biri 8 avqust 2025-ci il tarixli anlaşmanın icrası ilə bağlıdır. Xüsusilə “Tramp marşrutu”nun istifadəyə verilməsi və bunun regional kommunikasiyalara təsiri səfər zamanı müzakirə edilə biləcək əsas mövzulardandır.

Bununla yanaşı, ABŞ və Azərbaycan arasında strateji müttəfiqlik xartiyasının imzalanması istiqamətində artıq fəaliyyət göstərən işçi qrupunun mövcudluğu xüsusi əhəmiyyət daşıyır. Vensin səfərinin əsas məqsədlərindən biri məhz bu işçi qrupunun indiyə qədərki fəaliyyətinin nəzərdən keçirilməsi və onun daha da aktivləşdirilməsi ola bilər”.

Ekspertin fikrincə, strateji müttəfiqlik çərçivəsində ABŞ-Azərbaycan münasibətlərinin bir sıra mühüm istiqamətlər üzrə genişləndirilməsi gündəmdədir:

“Buraya ABŞ-ın Azərbaycana hərbi dəstək məsələləri, siyasi və iqtisadi əməkdaşlıq, regional təhlükəsizlik, hərbi sahədə qarşılıqlı əlaqələr daxildir. Xüsusilə süni intellekt sahəsində birgə layihələrin və texnoloji əməkdaşlığın müzakirəsi real görünür”.

Samir Hümbətov səfər çərçivəsində Azərbaycan-ABŞ-Ermənistan formatında üçtərəfli əməkdaşlığın dərinləşdirilməsi ilə bağlı müzakirələrin aparılması ehtimalının da yüksək olduğuna inanır:

“Düşünürəm ki, Vensin Azərbaycana səfəri çox böyük bir prosesin sürətlənməsinə təkan verə bilər”.