Dövlət Statistika Komitəsinin 2024-cü il üzrə maliyyə fəaliyyətinin auditi zamanı milyonlarla manatlıq avadanlıqların anbarlarda istifadəsiz qaldığı və mühasibat uçotunun düzgün aparılmadığı məlum olub.

Axar.az xəbər verir ki, bu barədə Hesablama Palatasının nəşri olan "Dövlət auditi" bülletenində bildirilib.

Audit sübutlarına əsasən, Komitədə faktiki olaraq istifadəyə verilməyən və anbarda mövcudluğu müəyyən edilən ümumilikdə 4 milyon 793 min manat dəyərində avadanlıq aşkar edilib. Bunların arasında ən böyük payı ümumi dəyəri 4 milyon 779 min 547 manat olan 11 min 507 ədəd planşet təşkil edir. Qaydalara zidd olaraq, bu istifadəsiz avadanlıqlar "Torpaq, tikili və avadanlıqlar üzrə kapitallaşdırılmış məsrəflər" əvəzinə "Torpaq, tikili və avadanlıqların dəyəri" hesabında uçota alınıb.

Həmçinin, informasiya təhlükəsizliyi üçün 2024-cü ildə 236 min manat dəyərində "mərkəzləşmiş antivirus sisteminin proqram təminatı" (1200 ədəd lisenziya) alınaraq istifadəyə verilsə də, bu qeyri-maddi aktivlərin mühasibat uçotunda düzgün əks etdirilmədiyi və maliyyə hesabatlarında təhrif yaradıldığı qeyd olunur.