Piramidanın rejissoru və daha bir nəfər həbsdə, istintaq davam gedir.

Gənc Tamaşaçılar Teatrının rejissoru, Əməkdar incəsənəət xadimi Ağalar İdrisoğlu Bakı Şəhər Baş Polis İdarəsində Cinayət Məcəlləsinin 178.3.1-ci maddəsi ilə başlanmış cinayət işi çərçivəsində həbs edilib. Onun barəsində Xətai Məhkəməsində hakim Bəxtiyar Əliyevin sədrliyi ilə keçirilən iclasda 2 ay müddətinə həbs-qətimkan tədbiri seçilib.

Bir müddət əvvəl DİN-in yaydığı rəsmi məlumatda Ağalar İdrisoğlu ilə yanaşı Hüseyn Nuriyev, Nəsir Hüseynov, Əhliman Camalov, Asim, Qalib, Elşən və s. şəxslərin barəsində də istintaq aparıldığı bildirilirdi.

Bakı Şəhər Baş Polis İdarəsinin İstintaq və Təhqiqat İdarəsində aparılan istintaqın gedişində Nəsir Hüseynov da həbs olunub. Mayın 16-da Xətai Məhkəməsinin qərarı ilə Nəsir Hüseynov barəsində də 2 aylıq həbs qətimkan tədbiri seçilib.

Qeyd edək ki, 1950-ci il təvəllüdlü Mehdiyev Ağalar İdris oğlunun maliyyə piramidası sxemi ilə fəaliyyət göstərən LNS MMC-yə rəhbərlik etməsi haqqında bir müddət əvvəl KİV-də məlumatlar yayılmışdı. Daha sonra Bakı Şəhər Baş Polis İdarəsində A.İdrisoğlunun da daxil olduğu mütəşəkkil dəstə barəsində Cinayət Məcəlləsinin 178.3.1-ci maddəsi ilə (mütəşəkkil dəstə tərəfindən dələduzluq) cinayət işinin açılmasına dair Daxili İşlər Nazirliyi məlumat yaydı. Rəsmi məlumatda göstərilir ki, Nəsir Hüseynov, Əhliman Camalov, Hüseyn Nuruyev, Ağalar Mehdiyev və s. şəxslər dələduzluq yolu ilə Bakı şəhər sakinləri Nəsib Qəhrəmanovadan 1850 manat, Qılman Nəsibovdan 1331 manat, İbrahim Məmmədovdan 2300 dollar, Rasim Qəhrəmanovdan 1500 manat, Fərhad Abdulovdan 1500 manat, İdris Şahbazovdan 1150 manat, Şamil Seyidzadədən 1650 manat, Pəhləvan Xudiyevdən 1220 manat, Rahim Cəfərovdan 1500 manat, Şəms Cabbarovadan 1455 manat, Ramilə Cəfərovadan 1425 manat, Sumqayıt şəhər sakini Hüriyyə Məmmədəliyevdən 3950 manat, Göyçay rayon sakinləri Samir İsrafilovdan 1175 manat, Elşən Əliyevdən 1500 manat, Füzuli rayon sakini Afət Alıyevdən 1650 manat və Beyləqan rayon sakini Müşfiq Şixəliyevdən 1850 manat almaları barədə Nizami Rayon Polis İdarəsinə aprelin 22-də ərizə ilə müraciət olub.

Bu şəxslər şəbəkə marketinqi vasitəsilə vətəndaşları aldatmaqda, onları işə düzəltmək və gəlir əldə etmək vədi ilə müxtəlif məbləğlərdə pul almaqda ittiham olunurlar.

Aldadılan şəxslərdən Fərhad Abdulov, Rahim Cəfərov, Əbulfəz Rzayev və digər şəxslər 2013-cü ildə özünü "Prezidentin vəkili" kimi təqdim edən tanınmış rejissor Mehdiyev Ağalar İdris oğlunun, Hüseyn Nuriyevin, Nəsir Hüseynovun, Əhliman Camalovun LNS şəbəkəsinə cəlb edilmələri adı ilə onlardan külli miqdarda pul almalarına dair hüquq-mühafizə orqanlarına və mətbuata ərizələr yazmışdılar. Şikayətçilərin bildirdiyinə görə, Ağalar İdrisoğlunun rəhbərliyi ilə qurulan LNS MMC maliyyə piramidası sxemi ilə fəaliyyət göstərirmiş. Hüseyn Nuriyev, Əhliman Camalov, Nəsir Hüseynov ayrı-ayrı şəxslərə LNS MMC-nin, guya, ölkə prezidentinin göstərişi ilə yarandığını, "Prezidentin vəkili", Əməkdar incəsənət xadimi, rejissor Ağalar İdrisoğlunun isə "yuxarıların tövsiyəsi" ilə bu işə rəhbər kimi təyin olunduğunu söyləməklə minlərlə şəxsin etimadını qazanıblar. A.İdrisoğlu və H.Nuriyev mətbuata verdikləri müsahibədə bildiriblər ki, 2008-2011-ci illərdə "Questnet" şirkətinin distribütorları olublar, 2012-ci ildə LNS MMC-ni qurublar və bu şirkətə rəhbərlik edirlər. Əhliman Camalov və Nəsir Hüseynov isə A.İdrisoğlu və Hüseyn Nuriyevin əsas təbliğatçıları idilər. Guya italyan şirkətinin Azərbaycanda nümayəndəsi olan "gözəgörünməz" Anar müəllimin vəzifəsi isə işlərə Türkiyədən dəstək vermək, İtaliya və Türkiyənin məşhur markalarının LNS şəbəkəsi vasitəsilə satışını təşkil etmək olub. LNS MMC-nin rəsmi təsisçisi olduğu deyilən Anar adlı şəxs barəsində geniş məlumat verilmir, o, şirkəti kölgədən idarə edir.

Məlumata görə, A.İdrisoğlu teatr aktyorlarını və mədəniyyət sahəsində çalışan çoxsaylı insanları qazanc əldə etmək vədi ilə piramida şəbəkəsinə cəlb edərək, bu ilin əvvəlindən isə Sumqayıt şəhərində LNS MMC-nin ofisini açaraq şəbəkənin fəaliyyətini şimal bölgələrinədək yayıbmış.

Bakının Nərimanov rayonunda Heydər Əliyev Mərkəzinin yaxınlığında böyük ofisləri olan LNS MMC-nin 3 il ərzində 30 mindən çox insanı maliyyə piramidasına cəlb etdiyi bildirilir. Şəbəkəyə cəlb olunan hər adamdan azı 125 manatdan başlayaraq 2000 manatadək pul alınır. Maraqlıdır ki, piramidaya daxil olan şəxslərə verdikləri pulların müqabilində kassa mədaxil qəbzi, müqavilə və s. sənədlər təqdim olunur. LNS MMC-nin maliyyə piramidasına 2012-2014-cü illərdə 11 milyon manata yaxın pul yığıldığı deyilir. Lakin milyonlarla dövriyyəsi olan və üzvlərinə də rəsmi sənədlər verən LNS MMC-nin vergi hesabatları "0" dərəcə ilə verilirmiş. 2013-cü ildə vergi hesabatlarında MMC-nin heç bir gəliri olmadığı, 2014-cü ilin ilk 3 ayında isə cəmi 3500 manat gəlir əldə etdiyi göstərilir.

Qeyd edək ki, mətbuatda LNS piramidasının Bakıdakı nurçuların əsas maliyyə qaynaqlarından biri olmasına dair məlumatlar da yayılmışdı. Həmin vaxt KİV-də açıqlama yayan H.Nuriyev və A.İdrisoğlu Axar.az-a bu məlumatları təkzib etmişdilər.