Ötən ayın 21-də Abşeron Rayon Polis Şöbəsinə rəis təyin olunan Şəhriyar Şəmşirli xidmət üzrə müavin postuna öz kadrının gətirilməsini təmin edib.

Axar.az xəbər verir ki, Xaçmaz RPŞ Xudat polis bölməsinin rəisi polis polkovnik-leytenantı Elçin Rəcəbov bu gündən Abşeron RPŞ-də xidmət üzrə müavin vəzifəsinin icrasına başlayıb.

Yeni rəisin daha bir kadr dəyişikliyi qərarı isə Təhqiqat Bölməsinin rəisi vəzifəsi ilə bağlı olub. Bir neçə gün öncə rəisin qəbulunda olan Abşeron RPŞ-nin Mehdiabad PB-nin rəis müavini Məhəmmədəli Yaqubov iyulun 16-da imzalanan əmrlə Polis Şöbəsinin Təhqiqat bölməsinə başçılıq edir.

Xatırladaq ki, hər iki vəzifə iyulun 4-dən boşalmışdı. Polis polkovnik-leytenantı, Abşeron rayon polis rəisinin xidməti işlər üzrə müavini Oqtay Süleymanlı işdə yol verdiyi nöqsana görə vəzifəsindən azad edilərək sərəncama göndərilmişdi. Təhqiqat bölməsinin rəisi Yusif Vəkilov isə (Məşhur Vəkilovlar nəslindəndir) yaşı ilə əlaqədar təqaüdə çıxmışdı.