Ana səhifə Gündəm |
"Biz dünyanın ən rəqabət qabiliyyətli 40 ölkəsinin sırasındayıq"
Bu ilin doqquz ayının nəticələri onu göstərir ki, 2014-cü il də tarixdə uğurlu il kimi qalacaq. Bu da təbiidir, çünki son illər ərzində aparılan islahatlar, irəli sürülmüş təşəbbüslər ölkəmizin dinamik inkişafını təmin edib.
APA-nın xəbərinə görə, bunu bu gün Nazirlər Kabinetinin iclasındakı çıxışı zamanı Azərbaycan prezidenti İlham Əliyev deyib.
Prezident deyib ki, doqquz ayın iqtisadi göstəriciləri çox
müsbətdir: "İqtisadiyyatımız inkişaf edir, artır. Xüsusilə qeyd
etməliyəm ki, Avropada iqtisadi maliyyə böhranı davam edir, ancaq
Azərbaycanda hər il iqtisadi inkişaf müşahidə olunur və bu ilin
doqquz ayında ümumi daxili məhsul 2,5 faiz artıb. Dünyada mövcud
olan vəziyyəti nəzərə alsaq, deyə bilərik ki, bu, çox müsbət
göstəricidir. Ən önəmlisi ondan ibarətdir ki, - bunu biz hər dəfə
məmnuniyyətlə qeyd edirik, - qeyri-neft sektorumuz 6 faiz artıb.
Qeyri-neft sektorunun artması, əlbəttə ki, bizim siyasətimizin
nəticəsidir. Çünki bizim üçün əsas məsələ qeyri-neft sektorunun
inkişafıdır".
Prezident qeyd edib ki, inflyasiya çox aşağı səviyyədədir - cəmi
1,5 faiz: " Əhalinin pul gəlirləri isə 5,4 faiz artıb. Beləliklə,
hər il olduğu kimi, əhalinin gəlirləri inflyasiyanı üstələyir və
bu, bilavasitə insanların yaşayış səviyyəsinə müsbət təsir
göstərir.Əminəm ki, inflyasiya ilin sonuna qədər də aşağı səviyyədə
olacaq. Çalışmalıyıq ki, gələn il də bu göstərici aşağı səviyyədə
olsun. Bunu xüsusilə qeyd etməliyəm, çünki büdcəmiz artır və bu il
də büdcə xərcləri kifayət qədər böyükdür. Maaşlar, pensiyalar
qalxır, doqquz ayda da qalxıb. Buna baxmayaraq, inflyasiya aşağı
səviyyədədir və bu da makroiqtisadi vəziyyətin sabit olmasını
göstərir".
Ölkə başçısı bildirib ki, ilin əvvəlindən 19 milyard dollar sərmayə
qoyulub, bunun 11 milyardı daxili sərmayədir.
Dövlət başçısı daxili investisiya artımının üstünlük təşkil
etdiyini də qeyd edib: "Daxili investisiyaların böyük hissəsi
dövlət investisiyalarıdır. Bu da təbiidir. Çünki hələ də dövlət
xətti ilə infrastruktur layihələrinə, o cümlədən sosial
infrastruktur layihələrinin icrasına vəsait ayrılmalıdır. Ancaq
Azərbaycana özəl sərmayə də qoyulur. Azərbaycanda çox müsbət
sərmayə iqlimi var, yerli və xarici investorlar bizim ölkəmizə,
onun gələcəyinə inanırlar. Buna görə Azərbaycana çox böyük həcmdə
investisiyalar qoyulur".
Prezident vurğulayıb ki, dünyanın əksər ölkələrində xarici
investisiyaları cəlb etmək üçün çox böyük işlər, rəqabət aparılır:
"Çünki hər bir ölkənin iqtisadi inkişafını investisiyalar müəyyən
edir. Bu gün avrozonada müşahidə olunan vəziyyət onu göstərir,
ekspertlər, alimlər qeyd edirlər ki, investisiyalar olmasa, bu
böhrandan çıxmaq çətin olacaq".
Prezident bildirib ki, ölkədə investisiya sənayenin, kənd
təsərrüfatının, turizm sektorunun inkişafına, həm də neft-qaz
sənayesinin inkişafına qoyulur: "Bizim iqtisadiyyatımız çoxşaxəli
iqtisadiyyatdır. Məhz buna görə iqtisadi artımımız davam edir.
Baxmayaraq ki, hazırda neftin qiyməti də kəskin şəkildə aşağı
düşür. Ancaq ölkəmiz qeyri-neft sektoru hesabına bundan sonra da
inkişaf edəcək və bu, bizim inkişafımızı dayanıqlı edəcək. Yəni,
bizim əsas məqsədimiz neft amilindən asılılığımızı maksimum
dərəcədə azaltmaq və qeyri-neft sektoru hesabına gələcəkdə
Azərbaycanı inkişaf etdirməkdir".
Ölkə başçısı deyib ki, Azərbaycanın kifayət qədər valyuta ehtiyatı
var.: "İlin əvvəlindən maliyyə resurslarımız 3 milyard 600 milyon
dollar artıb. Bütövlükdə bizim 53 milyard dollardan çox valyuta
ehtiyatlarımız var ki, bu da dünya miqyasında çox böyük
göstəricidir. Adambaşına düşən valyuta ehtiyatlarımız isə, hesab
edirəm ki, dünya miqyasında ən yüksək səviyyədədir".
Prezident deyib ki, neftdən əldə edilmiş gəlirləri şəffaf
saxlamaqla və ölkəmizin inkişafına, o cümlədən sosial layihələrin
icrasına yönəltməklə dinamik inkişaf təmin edilir: "Eyni zamanda,
bizim rezervlərimiz artır və artacaq. Mən qarşıya belə vəzifə
qoymuşam ki, biz çalışmalıyıq, maliyyə rezervlərimiz ildən-ilə
artsın. Bu da, əlbəttə ki, həm xarici investorlar üçün əlavə
imkanlar yaradır, inamı artırır, eyni zamanda, dünya maliyyə
bazarlarından yaxşı şərtlərlə kreditlərin alınması üçün əlavə
imkanlar yaradır. Halbuki buna o qədər də böyük ehtiyac yoxdur.
Sadəcə olaraq, bu, bizə əlavə inam verir. Mən dəfələrlə demişəm ki,
əvvəlki illərdə bizim əsas vəzifəmiz iqtisadi müstəqilliyimizi
yaratmaq idi. Bunu da yaratmışıq. Biz iqtisadi cəhətdən tam
müstəqilik, heç kimdən asılı deyilik və bu bizə imkan verir ki,
siyasi sahədə də, o cümlədən xarici siyasətdə də müstəqil siyasət
aparaq. Bizim əsas istinad nöqtəmiz, güc mənbəyimiz iqtisadi
müstəqilliyimizdir".
Prezident bildirib ki, Azərbaycanda aparılan islahatlar və
düşünülmüş iqtisadi siyasət dünyanın ən mötəbər iqtisadi qurumları
tərəfindən də yüksək qiymətləndirilir: "Davos Dünya İqtisadi Forumu
Azərbaycanı rəqabət qabiliyyətliliyinə görə 38-ci yerə layiq görüb.
Biz bir pillə də irəliyə getdik və dünya miqyasında bu göstəriciyə
görə 38-ci yerdə olmaq tarixi nailiyyətdir. Yəni, bir sözlə, biz
dünyanın ən rəqabət qabiliyyətli 40 ölkəsinin sırasındayıq. Bu,
tarixi nailiyyətdir və bizə əlavə inam verir. Biz onsuz da bilirik
ki, düz yoldayıq. Azərbaycan inamla inkişaf edir. Ancaq mötəbər,
böyük nüfuzu olan maliyyə-iqtisadi qurumların qiymətləndirməsi,
əlbəttə ki, çox önəmlidir".
Dövlət başçısı bütün infrastruktur layihələrinin uğurla icra
edildiyini də deyib: "Bu proses davam etdirilir. Regionların
sosial-iqtisadi inkişafı Dövlət Proqramı uğurla icra edilib. Yüz
mindən çox yeni iş yeri açılıb, onlardan 80 mini daimi iş
yerləridir. Proqramın əvvəlindən, 2004-cü ildən bu günə qədər 1
milyon 300 min yeni iş yeri açılıb. Bu da imkan verib ki, işsizlik
kəskin şəkildə aşağı düşsün və bu gün 5 faiz səviyyəsindədir. Bəzi
inkişaf etmiş ölkələrdə işsizlik 25, 30 faizdir, gənclər arasında
isə 50 faizə çatır. Ancaq Azərbaycanda işsizliklə bağlı problemlər
öz həllini tapır və burada əlbəttə ki, dövlət investisiyaları,
gözəl sərmayə iqlimi, biznes mühitinin yaxşılaşdırılması faktorları
öz rolunu oynayır. Eyni zamanda, regionların sosial-iqtisadi
inkişafına dair üçüncü Dövlət Proqramının icrası da burada əsas rol
oynayır. Çünki hələ bizim iqtisadiyyatımızda neft faktoru kifayət
qədər böyük yer tutur. Baxmayaraq ki, ümumi daxili məhsulumuzda
qeyri-neft sektoru artıq 55 faizdən çoxdur, ancaq ixrac
potensialımızın böyük əksəriyyəti neft-qazla bağlıdır. Onu da yaxşı
bilirik ki, neft-qaz sahəsində böyük həcmdə iş yerlərinin
yaradılması mümkün deyil. Ona görə bizim əsas hədəfimiz qeyri-neft
sektoru idi. O sektorda iş yerlərinin açılması əlbəttə ki,
işsizliyin aşağı düşməsinə xidmət göstərib".
Prezdent sosial proqramların icra edildiyini, maaş, pensiya, orta
əmək haqqının artırıldığını qeyd edib.
Ölkə başçısı deyib ki, məcburi köçkünlərin yaşayış səviyyəsinin
yaxşılaşdırılması üçün önəmli addımlar atılıb, bu il də köçkünlərin
yeni evlərlə təmin olunmaları üçün böyük vəsait ayrılıb: "Bu proses
gedir və gələn il də təbii ki, davam etdiriləcək".
Bir sözlə, ölkəmizin hərtərəfli inkişafı imkan verir ki, biz
gələcək Prezident bildirib ki, Azərbaycanın gələcək inkişafı ilə
bağlı düşünülmüş proqramı, konsepsiyası - "2020 konsepsiyası" var:
"Əlbəttə ki, bu layihələrin, infrastruktur layihələrinin icrası
imkan verəcək ki, dinamik inkişaf davam etsin".
Ölkə başçısı Bakı və onun qəsəbələri ilə bağlı da proqramın icra
edildiyini, ilk növbədə, su-kanalizasiya layihələri, daha sonra
kənd yollarının tikildiyini qeyd edib: "Həm regionların, həm də
Bakı və onun qəsəbələrinin sosial-iqtisadi inkişafı Dövlət
proqramları paralel şəkildə icra edilir və əminəm bizə imkan
verəcək ki, növbəti 2-3 il ərzində ölkə qarşısında duran əsas
infrastruktur layihələri başa çatacaq. Əlbəttə ki, bu, bizim
gələcək inkişafımıza müsbət təsir göstərəcək. Ona görə ki, böyük
investisiya layihələri artıq arxada qalır. Bu, imkan verəcək ki,
biz büdcə vəsaitini yeni istiqamətlərə yönəldək. Biznesin təşviqi,
biznes mühitinin yaxşılaşdırılması, özəl sektorun inkişafı üçün
daha da böyük həcmdə vəsait nəzərdə tutaq. Çünki hələ dövlət
investisiya xərclərinin təbii ki, böyük hissəsi infrastruktur
layihələrinə yönəlib. Su anbarları, magistral yollar, digər
layihələr, dəmir yolları, o cümlədən içməli su, kanalizasiya
layihələri, Oğuz-Qəbələ-Bakı su kəməri – bu nəhəng infrastruktur
layihələri böyük vəsait tələb edən layihələrdir. O cümlədən
gəmiqayırma zavodu, yeni beynəlxalq dəniz ticarət limanı, yəni,
bütün bu layihələr artıq icra edilib, ya da onların icrasına az
qalıb. Ona görə biz növbəti illərdə büdcə xərclərini daha çox
dayanıqlı inkişafı təmin edən layihələrə yönəltməliyik".
Prezident deyib ki, biznesin inkişafı üçün aparılan islahatlar
müsbət rol oynayıb: "Sahibkarlığın inkişafına həm siyasi, həm
maliyyə dəstəyi göstərilib və göstərilir. Beləliklə, ölkənin
dinamik inkişafı təmin edilib və bu gün Azərbaycanın müsbət
təcrübəsi öyrənilir. Bu yaxınlarda IV Bakı Beynəlxalq Forumunda
iştirak edən BMT-nin İnkişaf Proqramının direktorunun çıxışında da
səsləndi ki, Azərbaycanda yoxsulluğun azaldılmasında əldə edilmiş
təcrübə çox önəmlidir və başqa ölkələr üçün də örnək ola bilər.
Yoxsulluğun azaldılması bilavasitə bizim iqtisadi siyasətimizlə və
sosial siyasətlə bağlıdır. Mən bunu dəfələrlə demişəm, bu bizim
siyasətimizdir ki, sadəcə olaraq iqtisadi islahatlarla məşğul
olmamalıyıq. Biz sosial sahəyə böyük diqqət göstərməliyik. Çünki
köklü iqtisadi islahatlar bir çox hallarda sosial problemlərə
gətirib çıxarır. Ancaq Azərbaycanda bunun əksini görürük. Biz böyük
sosial layihələri icra etmişik. Vaxtilə sovet dövründən qalan
əmanətləri kompensasiya şəklində MDB məkanında ən qısa müddət
ərzində və ən yüksək əmsalla insanlara qaytardıq. Maaşlar,
pensiyalar durmadan artır. Bir daha demək istəyirəm ki, yanaşmamız
bundan ibarətdir və bu da ölkə qarşısında yeni imkanlar açır".
Prezident "Cənub" qaz dəhlizinin təməli qoyulduğunu, bunun tarixi
hadisə olduğunu da vurğulayıb: "Böyük, təntənəli mərasim keçirildi.
Bu layihənin icra edilməsi əlbəttə ki, tarixi hadisədir. Heç kəs
üçün sirr deyil ki, burada əsas rolu Azərbaycan oynayıb. Bu, bizim
təşəbbüsümüz, bizim resurslarımız idi. Biz qonşu ölkələrlə,
tərəfdaşlarla birgə bu layihəni icra edəcəyik. Əminəm ki, yaxın
gələcəkdə "Cənub" qaz dəhlizi tikiləcək, istifadəyə veriləcək və
ölkəmizin bundan sonra onilliklər ərzində inamlı inkişafını təmin
edəcək. Bizim siyasi çəkimiz artacaq, iqtisadi sahədə yeni imkanlar
yaranacaq. Kəmərin tikintisi zamanı minlərlə, on minlərlə
Azərbaycan vətəndaşı işlə təmin ediləcək, yüzlərlə Azərbaycan
şirkəti podratçı kimi iştirak edəcək. Yəni bu, ölkəmizə böyük gəlir
və siyasi dividend gətirən bir layihədir, tarixi layihədir. Biz
fəxr edirik ki, Azərbaycan bu tarixi layihənin icraçısıdır, lider
dövlətdir. Bu hadisə doğrudan da tarixdə qalacaq. Keçən əsrin
sonlarında "Əsrin kontraktı" imzalanmışdı. O, XX əsrin kontraktı
idi. Bu layihə isə XXI əsrin layihəsidir. Əminəm ki, biz bu
layihəni də uğurla icra edəcəyik".
Tarix
2014.10.08 / 23:55
|
Müəllif
Axar.az
|