Ötən gün Bakıda VI Bakı Beynəlxalq Humanitar forumu işə başlayıb. Forumun rəsmi açılış mərasimində Azərbaycan Prezidenti İlham Əliyev və birinci xanım Mehriban Əliyeva iştirak ediblər.

Hazırkı forumda 86 ölkədən 416 xarici qonaq və 24 beynəlxalq təşkilat iştirak edir. Beynəlxalq Humanitar Forum fərqli ölkələrdən məşhur dövlət xadimlərini, Nobel mükafatı laureatlarını, nüfuzlu beynəlxalq təşkilatların liderlərini, o cümlədən dünyanın siyasi, elmi və mədəni elitasının təmsilçilərini beynəlxalq məsələlər üzrə fikir mübadiləsi, müzakirə, dialoq aparmaq üçün bir araya gətirən prestijli tədbir sayılır.

Rusiyalı politoloq Pavel Klaçkov Axar.az-a açıqlamasında mötəbər tədbirə bir çox ölkənin, o cümlədən Rusiyanın göstərdiyi dəstəyin onun beynəlxalq əhəmiyyətindən xəbər verdiyini bildirib:

“Rusiya, sözsüz ki, Bakıda beynəlxalq forumun açılışını alqışlayır. Forumda ən yüksək səviyyədə iştirak da elə bundan xəbər verir. Biz Prezident Vladimir Putinin məktubunu Rusiya hökumətinin baş nazir müavini Olqa Qolodeçin şəxsən oxuduğunu gördük. Forumu qəbul edən tərəf də məhz bu cür yüksək səviyyədə təmsil olunmuşdu – forumda ölkə başçısı İlham Əliyev və birinci xanım Mehriban Əliyeva iştirak edirdi”.

“Forumun təşkilatçıları və iştirakçılarının - dünya mədəni elitasının nümayəndələrinin əsas məqsədi təbiət, sosial və humanitar elmlər sahəsində beynəlxalq səviyyədə gələcəkdə baxılması nəzərdə tutulan yeni humanitar gündəliyin formalaşdırılmasıdır. Rəsmi şəxslər, beynəlxalq təşkilatların təmsilçiləri, həmçinin, bir sıra nüfuzlu mütəxəssislər iki gün ərzində bəşəriyyəti narahat edən aktual məsələlərin həll yollarını axtaracaq”, - forumun gündəliyində deyilib.

“Hazırda dünya miqyasında humanizm sahəsində böhranın olması heç kimə sirr deyil. Bir çox KİV və internet resurslarında dezinformasiyanın üstünlüyü, manipulyasiya, saxta xəbərlər hökmranlıq edir. Biz həmçinin, zorakılığın da artdığını müşahidə edirik”, - Klaçkov müasir cəmiyyətin problemləri barədə danışarkən deyib.

VI Bakı Beynəlxalq Humanitar Forumunun diqqət mərkəzində bizim gələcək dünyamızı formalaşdıracaq kreativ ideyaların reallaşdırılması üçün yolların axtarılması dayanacaq. İnsan məsuliyyəti, humanizm, dövrümüzün ən vacib çağırışlarını qarşılamaq qabiliyyətinə olan dərin inam ön planda olacaq.

“Humanizm böhranından çıxış yollarının birlikdə axtarılması çox vacibdir. Əməkdaşlıq, tərəfdaşlıq və həmrəyliyin yeni prinsipləri də məhz birlikdə hazırlanmalıdır. Əminəm ki, bir çox iradənin, şüurun, müxtəlif ölkələrin və təşkilatların maraqlarının toplanmasının təsiri bütün gözləntiləri aşacaq və təsiri çox güclü olacaq. Çünki hazırda bütün dünya ictimaiyyəti bu problemlərin həllində maraqlıdır. Bu mənada Bakı forumunun da beynəlxalq vəziyyətə təsir etmək şansı var”, - politoloq fikrini tamamlayıb.