Poroşenko ilk turda Zelenskiyə uduzsa da, ikinci turda digər namizədlərin elektoral bazasını özünə tərəf çəkməklə və uğurlu təbliğat aparmaqla qalib gələcək.

Bu sözləri Axar.az-a açıqlamasında sabiq dövlət müşaviri Qabil Hüseynli deyib. Politoloq bildirib ki, Zelenskinin ilk turda qələbə çalması ukraynalıların onu II turda da dəstəkləyəcəyi anlamına gəlmir:

“Sadəcə olaraq müəyyən oliqarxların dəstəyi və güclü liderlərin olmaması üzündən Zelenski ilk turda Poroşenkonu üstələdi. Poroşenko ötən 5 ildə qarşısına qoyduğu hədəflərə nail ola bilməsə də, prezidentliyə namizədlər içərisində Ukrayna üçün ən ideal variant Poroşenkodur. Poroşenko ilk turda uduzsa da, ikinci turda digər namizədlərin elektoral bazasını özünə tərəf çəkməklə və uğurlu təbliğat aparmaqla qalib gələcək. Təbii ki, inzibati resurslar da işə düşəcək. Üstəlik, Qərb ölkələri Poroşenkonun prezidentlik fəaliyyətindən razıdır və onun növbəti 5 ildə Ukraynanı daha uğurlu hədəflərə aparacağına inanır. Bu mənada Rusiya Ukraynada istəyinə nail olmayacaq və Qərbə uduzacaq”.

Politoloq vurğulayıb ki, torpaqları işğal altında olan bir ölkənin taleyini gənc, heç bir dövlətçilik təcrübəsi olmayan şəxsə tapşırmaq Ukrayna xalqı qarşısında böyük bir cinayət olardı:

“Ukraynalılar ayıq xalqdır və əminəm ki, öz səslərini daha prinsipial şəxs olan Poroşenkoya verəcəklər”.

Qeyd edək ki, Ukraynada 21 apreldə keçiriləcək prezident seçkilərinin ikinci turunda ilk iki yeri tutan namizəd – Zelenski (30,24%) və Poroşenko (15,95%) mübarizə aparacaq.