00:03

Ermənistan hakimiyyətinin bu gün Qarabağla bağlı seyr etdiyimiz siyasəti tam olaraq Levon Ter-Petrosyanın bu münaqişə haqda proqramının davamıdır. Onun məşhur sitatını yada salaq: “Serqocan, biz Qarabağı qaytarmasaq, pis gündə yaşayacağıq”.

Axar.az xəbər verir ki, bu sözləri ehtiyatda olan erməni generalı Vitali Balasanyan mətbuat konfransında deyib.

Onun sözlərinə görə, o, Azərbaycanın Ağdam şəhərini işgal edən erməni əsgərlərinə başçılıq edib.

“Mən Ağdama hücuma keçən hərbi birləşmənin komandiri idim. Bizə o vaxtkı hakimiyyət tərəfindən tapşırıq gəldi: “Ağdama girməyin!” Amma mən bu qərara fikir verməyib, hücuma keçdim. Fürsəti əldən vermək olmazdı. Biz bir günə Ağdamı öz nəzarətimiz altına aldıq. Demək olar ki, hər gün hakimiyyətdən telefonoqramlar gəlirdi: "Ağdamı boşaldın!" Onu demək istəyirəm ki, Ter-Petrosyanın Qarabağla bağlı planı başqadır və hazırkı hakimiyyət bu yola davam edir. Paşinyan Qarabağı qaytarmaq istəyir”, - Balasanyan qeyd edib.

Erməni generalın fikrincə, Dağlıq Qarabağa Azərbaycan bayrağı altında geniş muxtariyyət veriləcək.