Ana səhifə Gündəm |
"Avropa Şurası Parlament Assambleyasının yay sessiyası
çərçivəsində 2015-ci il iyunun 23-də qəbul edilmiş "Azərbaycanda
demokratik təsisatların fəaliyyəti" barədə qətnamə Azərbaycana
qarşı yönəldilmiş qərəzli və əsassız yanaşmanın daha bir
nümunəsidir".
APA-nın məlumatına görə, bu barədə Azərbaycan Xarici İşlər
Nazirliyinin mətbuat xidmətinin yaydığı bəyanatda deyilir.
"Ərazisinin Ermənistan Respublikasının təcavüzü nəticəsində
işğalına, işğal edilmiş ərazilərdə və elə Ermənistanın özündə etnik
təmizlə aparılması nəticəsində doğma yurdlarından qovulmuş bir
milyona yaxın qaçqın və məcburi köçkününün olmasına baxmayaraq,
Azərbaycanda mövcud olan siyasi sabitlik, iqtisadi inkişaf, sosial
rifah, azad vətəndaş cəmiyyəti, söz və fikir azadlığı, o cümlədən
çoxsaylı siyasi partiyaların, qeyri-hökumət təşkilatlarının və
mətbuat orqanlarının fəaliyyətinin təmin olunması göz önündədir.
Bütün bunlar hər hansı beynəlxalq təşkilat tərəfindən alqışlanmaq
üçün deyil, məhz Azərbaycan xalqının mənafeyi naminə təmin edilib.
Belə bir sənədin qəbulu Avropa Şurası və onun Parlament
Assambleyası da daxil olmaqla, Avropa təsisatları tərəfindən
dinamik inkişafa malik dünyəvi müsəlman ölkələrinin qəbul
edilməməsindən qaynaqlanır və Avropada sürətlə vüsət alan
islamofobiyanın aydın təzahürüdür".
Bəyanatda qeyd olunub ki, Azərbaycan dövləti milli maraqlara cavab
verən konstruktiv təklif və tövsiyələrə həmişə açıq olub. "Müstəqil
və suveren dövlətin daxili işlərinə qarışılması, ona qarşı təhqir
və təzyiq məqsədi ilə qəbul edilmiş hər hansı sənəd isə qəti
şəkildə qəbuledilməzdir. Belə qərəzli münasibət və ikili
standartların nümayiş etdirilməsi isə öz növbəsində Azərbaycanı AŞ
və onun Parlament Assambleyasında iştirakının ölkəyə nə dərəcədə
lazım olması barədə ciddi düşünməyə vadar edir".
Tarix
2015.06.25 / 20:14
|
Müəllif
Axar.az
|