Moskva ilə Qərb arasında silsilə danışıqlar əslində heç bir nəticə vermədi. Amma mən qərəzli rus ekspertlərinin bu görüşü müsbət şərh etmələrinə təəccüblənmədim. Onlar yüksək səslə bəyan etdilər ki, bu danışıqlar Rusiya üçün guya növbəti heyrətamiz “qələbə” idi, çünki Qərb ən azı onunla danışıqlar masası arxasına oturdu.

Bu sözləri Axar.az-a açıqlamasında xarici siyasət, müdafiə və təhlükəsizlik üzrə rusiyalı ekspert Qriqori Trofimçuk deyib.

“Mən razılaşmıram ki, Moskva qəsdən gələcək fəaliyyətini davam etdirmək, əl-qolunu tam açmaq üçün ABŞ və NATO-ya perspektivsiz tələblər irəli sürüb. Və budur, əllər tamam açılıb, amma Rusiya xarici işlər naziri nəyisə gözləyən “faytonçu” haqqında danışmağa davam edir. Düşünmürəm ki, bilərəkdən Rusiyanın zəifliyini nümayiş etdirmək Moskvanın məqsədi idi. Moskva, deyəsən, Qərbin 2018-ci ilin martından bəri yığılan qabaqcıl rus silahları ilə bağlı nağıllardan qorxacağına ümid edirdi. Amma bu baş vermədi, indi bundan sonra nə edəcəyimizi düşünməliyik”, - həmsöhbətimiz bildirib.

Trofimçuk bildirib ki, olanları belə təsvir etmək olar: Azadlıq heykəli lazer şüası ilə yarıya bölünməyəcək:

“Təəssüf ki, ABŞ-ın bütün bunları hiss etməsi nəzərə çarpır və indi onlar daha da irəliləmək niyyətindədirlər. Eyni zamanda, bütün dünya iki lokomotivin toqquşmasından əvvəl donub qaldı: Rusiya və Anti-Rusiya”, - Trofimçuk bildirib.