Dövlət Miqrasiya Xidməti (DMX) Qusarda maarifləndirmə tədbiri keçirib və 135-dən çox şəxsə səyyar xidmət göstərib.

Axar.az DMX-nin mətbuat xidmətinə istinadən xəbər verir ki, miqrasiya sahəsindəki yeniliklərlə, qanunvericilikdəki dəyişikliklərlə bağlı təşkil olunmuş maarifləndirmə tədbirində Xaçmaz regional miqrasiya idarəsinin və Xidmətin aparatının səlahiyyətli nümayəndələri çıxış ediblər.

Bildirilib ki, Xidmətin fəaliyyətində ictimaiyyətin maarifləndirilməsinə xüsusi yer ayrılır. Məqsəd istər Azərbaycan vətəndaşlarının, istərsə də əcnəbilərin və ya vətəndaşlığı olmayan şəxslərin rahatlığını təmin etmək, onların suallarını birbaşa yerindəcə cavablandırmaq, mövcud problemləri dərhal həll etməkdir.

Qeyd olunub ki, Prezident İlham Əliyev tərəfindən digər sahələrdə olduğu kimi, miqrasiya sahəsində də miqrasiya idarəetmə mexanizminin təkmilləşdirilməsi, miqrasiya proseslərinin idarəolunması və tənzimlənməsi məqsədilə həm qanunvericilik, həm də onun tətbiqi sahəsində bir sıra ciddi addımlar atılır, əsaslı tədbirlər həyata keçirilir. 2016-cı ilin Azərbaycanda "Multikultiralizm ili" elan edilməsi dövlətimizin nə qədər tolerant, dözümlülük prinsipləri əsasında idarə edilməsinin daha bir nümunəsidir.

Bildirilib ki, miqrant daimi və ya məqsədindən asılı olaraq müvəqqəti yaşamaq üçün ölkə daxilində və ya bir ölkədən digər ölkəyə miqrasiya edən şəxsdir. Miqrantlar iki kateqoriyaya ayrılır. Miqrasiya etdiyi təyinat ölkəsinin qanunvericiliyinə uyğun olaraq, həmin ölkəyə gəlmə və ölkədən getmə, orda olma, yaşama və bundan irəli gələn digər qaydalara əməl edən əcnəbi və vətəndaşlığı olmayan şəxslər qanuni miqrantlardır. Eyni zamanda, həmin tələblərdən ən azı birinə əməl etməyənlər isə qanunsuz miqrantlar sayılır.

Tənzimlənməyən miqrasiya proseslərinin mənfi təsirinin qarşısının alınması çox ciddi məsələdir. Çünki miqrasiya siyasəti ölkənin təhlükəsizliyinə birbaşa təsir edən amillərdəndir. Bu istiqamətdə də Dövlət Miqrasiya Xidməti tərəfindən insan və vətəndaş hüquq və azadlıqlarına hörmət, qanunçuluq və humanizm prinsipləri əsas götürülməklə lazımi tədbirlər müvəffəqiyyətlə həyata keçirilir. Azərbaycanda miqrasiya proseslərinin yüksək səviyyədə idarə olunması, miqrantların hüquqlarının müdafiəsi beynəlxalq təşkilatlar tərəfindən yüksək qiymətləndirilir.

Qloballaşan dünyada bəzi dövlətlər intellektual və əmək potensialından istifadə edilməsi üçün əsasən ixtisaslı mütəxəssislərin ölkələrinə cəlb olunmasında, miqrasiyasında çox maraqlıdır. Amma bu gün məcburi miqranta – qaçqın və köçkünə çevrilənlər daha çoxdur.

Qeyd olunub ki, Ermənistanın Azərbaycana təcavüzü nəticəsində ölkəmiz hələ müstəqilliyinin ilk illərindən böyük miqrasiya problemi ilə üzləşib. 9,7 milyona yaxın əhalisi olan Azərbaycan adambaşına düşən məcburi köçkün sayına görə dünyada ən böyük didərgin yükünə sahib ölkələrdən biridir. Azərbaycan hökuməti doğma yerlərini tərk etməyə məcbur olmuş insanların problemlərini əsasən öz üzərinə götürüb. İyirmi ildən çox müddətdə 250 min qaçqın və məcburi köçkün müvəqqəti yaşayış üçün yeni salınmış 94 müasir qəsəbəyə köçürülüb. Doğrudur, Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə torpaqlarımızın işğaldan azad ediləcəyi gün o qədər də uzaqda deyil. Düşmənə endirilən sonuncu zərbə də Azərbaycan əsgərinin nəyə qadir olduğunu göstərib.

Təəssüf hissi ilə diqqətə çatdırılıb ki, hazırda Avropa xarici müdaxilə nəticəsində Yaxın Şərqdə baş verən münaqişələrə görə pənah aparan 600-700 min qaçqının əlində aciz qalıb, hansı qərarı qəbul etmək barədə çətinlik çəkir. Həmin qaçqınlar o ölkələrdə çox ciddi problemlərlə üzləşir, bütün hüquqları tamam pozulur.

Görüşdə 2009-cu il iyulun 1-dən miqrasiya proseslərinin idarə olunmasında "bir pəncərə" prinsipi üzrə vahid dövlət orqanının səlahiyyətlərini həyata keçirən DMX-nin fəaliyyət istiqamətləri haqqında da məlumat verilib. Qeyd olunub ki, bu gün Azərbaycana təşrif buyuran əcnəbilərin ilk müraciət etdiyi qurumlardan biri Dövlət Miqrasiya Xidmətidir. Ölkədə əcnəbilərin və vətəndaşlığı olmayan şəxslərin olduğu yer üzrə qeydiyyatı ilə bağlı müraciət qaydaları, xarici vətəndaşın qeydiyyata düşdüyü ünvanda yaşamadığına görə yaranan inzibati məsuliyyət bir daha izah olunub.

Həmçinin vətəndaşsızlıq hallarının aradan qaldırılması istiqamətində görülən işlərdən, regionlarda keçirilmiş çoxsaylı tədbirlərin konkret nəticələrindən danışılıb. Ümumiyyətlə, belə hallarla üzləşən şəxslərin mütləq Dövlət Miqrasiya Xidmətinə və ya regional miqrasiya idarələrinə müraciət etmələrinin vacibliyi əsaslandırılıb.

Təhsil ocaqları və yerli icra strukturları rəhbərlərinin nəzərlərinə çatdırılıb ki, ölkədə müvəqqəti və ya daimi yaşamaq üçün əsas verən sənədləri olmayan əcnəbi şagirdlərin müvafiq sənədləşmə işləri ilə bağlı Dövlət Miqrasiya Xidmətinə müraciətlərinin tezləşdirilməsi üçün köməklik göstərsinlər. Dərs ilinin bitməsinə az vaxt qalır və həmin şagirdlər müvafiq dövlət qurumları tərəfindən imtahanlara buraxılması üçün Dövlət Miqrasiya Xidmətindən respublikada müvəqqəti və ya daimi yaşamaq üçün əsas verən vəsiqə almalıdırlar. Doğrudur, belə şəxslərin vaxtında sənədləşdirilməsi istiqamətində məqsədyönlü tədbirlər həyata keçirilib. Amma bu məsələyə laqeyd yanaşan, övladının sənədləşdirilməsi üçün müraciət etməyənlər də olur.

Tədbirdə ölkədə miqrasiya sahəsində həyata keçirilən proseslərdə ictimaiyyətin fəallığının artırılması, bu sahədə qeyri-hökumət təşkilatları ilə qarşılıqlı fəaliyyətin dərinləşdirilməsi məqsədilə Dövlət Miqrasiya Xidməti yanında İctimai Şuranın, sahibkarlıq fəaliyyəti göstərən fiziki və hüquqi şəxslərin şikayətlərinə baxılması sahəsində şəffaflığın və obyektivliyin təmin edilməsini, bu baxımdan şəxslərin hüquqlarının və qanunla qorunan maraqlarının müdafiəsi məqsədilə "Azərbaycan Respublikasının mərkəzi və yerli icra hakimiyyəti orqanlarında Apelyasiya Şuralarının yaradılması haqqında" Azərbaycan Prezidentinin 2016-cı il 3 fevral tarixli Fərmanının icrasını təmin etmək məqsədilə yaradılan Dövlət Miqrasiya Xidmətinin Apelyasiya Şurasının fəaliyyəti barədə də məlumat verilib.

Həmçinin bu il martın 1-dən qüvvəyə minmiş yeni İnzibati Xətalar Məcəlləsindəki yeniliklər haqqında da izahedici söhbət aparılıb, suallar cavablandırılıb.

Sonra səyyar xidmət göstərilib. Səyyar xidmətin imkanlarından müraciət edən 135-dən çox şəxs istifadə edib. Onlardan 26-dan vətəndaşlıq mənsubiyyətinin müəyyən olunması, əcnəbi və ya vətəndaşlığı olmayan 4 nəfərdən müvəqqəti yaşama icazələrinin verilməsi ilə bağlı sənədlər qəbul olunub. 21 şəxsə Azərbaycan Respublikasının ərazisində müvəqqəti yaşamaq üçün icazə vəsiqələri, 54 nəfərə vətəndaşlıq mənsubiyyətinin müəyyən olunması ilə bağlı arayışlar verilib. Otuzdan çox şəxsə isə DMX-nin funksiyalarına aid olan xidmətlərlə bağlı müraciət etmək üçün qanunvericiliyə uyğun sənədlərin siyahısı təqdim olunub.

Müraciət edənlər görüşə və səyyar xidmətin təşkilinə görə minnətdarlıqlarını ifadə ediblər.

Mariya Maspaxova bildirib: "Rusiyadan gəlmişəm. Qusar şəhərində yaşayıram. Oğlum məktəblidir. Onun üçün vəsiqə almalıyıq. Dövlət Miqrasiya Xidmətinə təşəkkürümüzü bildirirəm ki, şəhərimizə gəlib bizə yerindəcə xidmət göstərir".

Niftəli Fərzəliyev də minnətdarlığını bildirərək deyib: "Qusar sərhəd rayonudur. Rayonda yaşayan, qonaq gələn əcnəbilərə xidmət göstərilməsi üçün Dövlət Miqrasiya Xidmətinin Qusar şəhərində təşkil etdiyi həm maarifləndirmə tədbirinə, həm də səyyar xidmətə görə minnətdarlığımızı bildiririk. Çünki işimizi xeyli asanlaşdırdılar".