Xəzər rayonunun Zirə qəsəbəsində yerləşən, sakinlərin çimərlik kimi istifadə etdikləri ərazidə dəniz suyunun tünd qəhvəyi, palçıq rəngini xatırladan çalara düşməsi narahatlıq yaradıb.

Axar.az-ın Oxu.az-a istinadən məlumatına görə, görüntülərdə sahilboyu ərazidə suyun geniş bir hissəsinin qəhvəyi rəng aldığı müşahidə edilir.

Sakinlər sözügedən suyun tərkibindəki maddələrin nədən qaynaqlandığını bilmədikləri üçün təşvişə düşdüklərini qeyd edirlər.

Məsələ ilə bağlı Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən bildirilib ki, əməkdaşlar tərəfindən əraziyə baxış keçirilib.

Qurumun məlumatına görə, sudan nümunələr götürülərək Xidmətin tabeliyində fəaliyyət göstərən Mərkəzi Laboratoriyaya təqdim olunub.

"Hazırda nümunələr üzrə laborator analizlər aparılır və nəticələr əldə olunduqdan sonra ictimaiyyətə ətraflı məlumat veriləcək.

Eyni zamanda bildiririk ki, aparılmış ilkin araşdırmalar zamanı sözügedən ərazidən Xəzər dənizinə istiqamətlənmiş hər hansı axar müşahidə edilməyib", - deyə açıqlamada qeyd olunub.