Təbrizin imam cüməsi höcətül-islam Seyid Məhəmməd Əli Alihaşim Ərk qalası ətrafında gedən tikintilərin tezliklə dayandırlacaqını bildirib.

Kult.az xəbər verir ki, parlamentin “90-cı maddə”si komisiyasının üzvləri ilə görüşündə Ərk qalası ətrafındakı durumu şərh edən Əli Alihaşim abidəyə zərər vuracaq tikinti işlərinin aparılmayacağını qeyd edib:

“Qalanın ətrafında avtomobil dayancağı tikmək o qədər də vacib deyil. Şərqi Azərbyacan vilayətində qanuna zidd və mədəni abidələrə ziyan vuracaq heç bir tikinti işi aparılmayacaq”.

Təbriz imam cüməsinin bu çıxışından sonra qala ətrafında aparılan tikinti işlərinin dayandırılacağı və ətrafında abadlıq işlərinin aparılacağı gözlənilir.

Qeyd edək ki, son zamanlarda Təbrizin tarixi qalalarından sayılan Ərk qalası ətrafında ağır tonnajlı maşınlarla qazıntı və tikinti işləri aparılırdı. Bu isə İranda tarixi abidələrin qorunması qanununun pozulması demək idi.

Yerli əhali buna kəskin etirazını bildirmişdi.