Oktyabrın 5-i futbol üzrə milli komandamızın Çexiya yığmasına qarşı keçirəcəyi Dünya Çempionatının seçmə qrup matçının biletləri satışa çıxarılıb.

Axar.az xəbər verir ki, bu barədə məlumatı AFFA yayıb. Bakı Olimpiya Stadionunda baş tutacaq oyun üçün biletləri Heydər Əliyev Sarayının kassalarından, 28 Mall, Gənclik Mall, M.Rəsulzadə 3 (Azərbaycan k/t yaxınlığı), Bülbül prospekti, Nizami küç. (Nizami k/t yaxınlığı), Üzeyir Hacıbəyov küç. 69x (Hökumət evinin arxası) ünvanlarından, ASAN Xidmət mərkəzlərindən (1,2,3 və 4), eləcə də onlayn olaraq iTicket.az saytından almaq mümkündür.

Biletlərin qiyməti VİP yerlər üçün isə 50, digərləri isə kateqoriyalara uyğun olaraq 1-6 manatdır.

Qeyd edək ki, sentyabrın 27-də Çempionlar Liqasının (ÇL) qrup mərhələsinin "Qarabağ" – “Roma” və Azərbaycan – Çexiya oyunu keçiriləcəyini nəzərə alaraq, AFFA və “Qarabağ” futbol klubu birgə layihə həyata keçirir. Layihəyə əsasən, azarkeşlərə güzəştlər tətbiq ediləcək. Belə ki, “Qarabağ” – “Roma” oyununun biletini kassalara təqdim edən azarkeşlər millinin Çexiyala qarşılaşması üçün bileti 50 faiz ucuz əldə edəcəklər.