Dünya çempionu İlham Zəkiyevə brayl əlifbası ilə çap edilmiş "Qurani-Kərim" təqdim edilib.

Dini Qurumlarla İş üzrə Dövlət Komitəsindən Axar.az-a verilən məlumata görə, komitə sədri Mübariz Qurbanlı Azərbaycanın paralimpiyaçı cüdoçusu, ikiqat Paralimpiya, beşqat Avropa və dünya çempionu, I Avropa Oyunlarının qızıl medalçısı İlham Zəkiyevlə görüşüb.

Mübariz Qurbanlı qeyd edib ki, İlham Zəkiyevin həm döyüşçü, həm də idmançı kimi keçdiyi şərəfli yol hər bir gənc üçün nümunə və qürur mənbəyidir.

Dövlət Komitəsinin sədri İlham Zəkiyevə möhtərəm Prezidentimiz İlham Əliyevin göstərişinə əsasən dini kitabların çapı üçün ayrılmış vəsait hesabına Azərbaycanda ilk dəfə gözdən əlil insanlar üçün brayl əlifbası ilə nəşr edilən "Qurani-Kərim" hədiyyə edib. İdmançıya 2016-cı ildə Rio-de-Janeyro şəhərində keçiriləcək Yay Paralimpiya Oyunlarında uğurlar arzulayıb.

İlham Zəkiyev diqqətə və hədiyyəyə görə təşəkkürünü bildirib. O qeyd edib ki, brayl əlifbası ilə nəşr olunmuş "Qurani-Kərim" onun aldığı ən qiymətli hədiyyələrdən biridir.