Dünya Bankının və digər maliyyə institutlarının hesabatları göstərir ki, yaxın beş il və daha çox dövr üçün neft qiymətlərinin artımı elə də yüksək olmayacaq.

Bu sözləri Axar.az-a açıqlamasında Neft Araşdırmalar Mərkəzinin rəhbəri İlham Şaban deyib. Ekspertin sözlərinə görə, Dünya Bankı hələ ki, pozitiv ssenaridən çıxış edir:

"Dünya Bankı cari ildə qara qızılın orta qiymətini bir barrel üçün pessimist ssenaridə 52-53 dollar, real 55 dollar, pozitiv isə 57-58 dollar proqnozlaşdırır. Dünya Bankının açıqladığı bu rəqəm neftin son 5 həftə ərzində ucuzlaşdığı şəraitdə və IV rüb üçün qiymətlərdə artımla bağlı ürəkaçan xəbərlərin olmadığı zamanda heç də pis göstərici deyil.

Neftin yalnız 2020-ci ildə 72 dollar səviyyəsinə çatacağı güman edilir".

Ekspertin sözlərinə görə, Azərbaycan bu proqnozları izləyir və buna uyğun tədbirlər alır:

"Cari ildə Neft Fondundan dövlət büdcəsinə 10 milyard 388 milyon manat vəsaitin köçürülməsi proqnozlaşdırılıb. Neft Fondunun rəsmi məlumatına görə, ilin I yarısında büdcəyə 3 milyard 561,6 milyon manat vəsait köçürülüb. (Yəni proqnoz göstəricilərinin 34,2 faizi). Bu, onu göstərir ki, hökumət Neft Fondundan xərcləmələrə ehtiyatla yanaşmağa başlayıb və dünya bazarında neftin qiymətlərinə müvafiq olaraq bu xərcləməri tənzimləyir".