Bankdan kredit istəyərkən vətəndaşdan girov və zamin tələb edilir. Çünki vətəndaşa etibar etmirlər. Vətəndaş da bankda pul saxlayanda (bank hesabında, maaş, yaxud təqaüd və ya digər növ kartda, başqasına pul köçürəndə), ona kredit vermiş olur. Bunun müqabilində isə bank vətəndaşa girov və ya zamin təqdim etmir.

Axar.az xəbər verir ki, bu fikirlərlə ekspert Əkrəm Həsənov çıxış edib. Ekspert III rüb üzrə bankların təhlükəsizlik meyarından danışarkən vətəndaşları bəzi banklarla əməkdaşlıqda diqqətli olmağa çağırıb.

Ekspert qeyd edib ki, vətəndaş bankda pul saxlayanda vəsaitin Əmanətlərin Sığortalanması Fondunda sığortalandığını bildirir:

"Həmin Fondun dövlətə heç bir aidiyyəti yoxdur. Biri-iki bank müflis olsa, Fondun özündən əsər-əlamət qalmayacaq. Həm də bu Fonddakı pulun harada və necə idarə olunması da müəmmalıdır.

Bəs onda vətəndaş nəyə əsasən banka etibar edərək pulunu ona verir? Bank etibarlı olduğunu vətəndaşa necə sübut etməlidir?

Sivil dünyada bank şəffaf olması ilə etibar qazanır.

Qanunvericilik tələb edir ki, banklar rübdə bir dəfə maliyyə hesabatlarını saytlarında dərc etsin. Lakin böyük əksəriyyəti bunu tam və ya qismən etmir. Faktiki olaraq bu banklar maliyyə göstəricilərini müştərilərindən gizlədir, onları aldadır. Girovsuz-zaminsiz kredit verməyən banklar əhalinin pulunu qanunsuz cəlb edir. Nəticədə həmin banklardakı müştəri vəsaitləri böyük təhlükəyə düşmüş olur".

Təhlükəli və qismən təhlükəli banklar

Ekspert bu təhlükəni aradan qaldırmaq üçün III rübün nəticələri üzrə həmin təhlükəli bankların siyahısını təqdim edir:

"Etibarlı bank özü haqda qanunvericiliyin tələb etdiyi məlumatı açıqlamalıdır. Bunu etmirsə, deməli, vəziyyəti çox pisdir və ya pisləşməyə başlayıb. Rüblük hesabatını qismən açıqlayan yalnız 2 bank var: Unibank və Kapitalbank.

27 bank rüblük hesabatını ümumiyyətlə dərc etmir: Nikoil Bank, AGBank, Amrahbank, AtaBank, Atrabank, Bank Avrasiya, Bank BTB, Bank Respublika, Bank Standard, Caspian Development Bank, DekaBank, Dəmirbank, Gəncəbank, Günaybank, XalqBank, KredoBank, Muğanbank, Naxçıvanbank, Pakistan Milli Bankı Bakı filialı, ParaBank, Rabitəbank, YapiKrediBank, United Credit Bank, Zaminbank, Ziraat Bank, Bank of Azerbaijan və Bank Technique".

Etibarsız banklar

Ən etibarsız banklara gəldikdə isə, bu, Rusiyaya məxsus və ya Rusiya ilə sıx bağlı olan iki bankdır: VTB və Nikoil. Rusiya çox ağır maliyyə durumundadır. Bu baxımdan sözügedən iki banka əmanət etdiyiniz pulu onlar Rusiyadakı müştərilərinə kredit kimi versə, həmin pullar geri qayıtmaya bilər".

Bu banklara etibar etmək olar

Ekspert etibar etməyə layiq olan bankların da adlarını açıqlayıb:

"Hesabatı tam yerləşdirmiş və bölüşdürülməmiş mənfəətlə işləyən bankların sayı isə 10-dur: Accessbank – 67 mln-dan çox, Bank of Baku – 44 mln-dan çox, Expressbank – 18 mln-dan çox, ASB – 12 mln-dan çox, AFB – 7 mln-dan çox, PaşaBank – 3 mln-dan çox, Bank Silk Vay – 3 mln-dan çox, NBC Bank – 3 mln-dan çox, Turanbank – 1 mln-a yaxın, Qafqaz İnkişaf Bankı – 253 min. Bu banklar daha çox etibara layiqdir.

Əvvəla, maliyyə göstəricilərini gizlətmirlər. Digər tərəfdən isə mənfəətlə işləyirlər, yəni yalnız əhalidən cəlb etdikləri pulla deyil, həm də öz vəsaitləri ilə işləyir və risk edirlər.

Ən etibarlı isə 2 dövlət bankıdır: Azərbaycan Beynəlxalq Bankı və AzərTürkBank. Çünki dövlət onların cəlb etdiyi əmanətlərə görə əhali qarşısında tam məsuliyyət daşıyır".