2023-cü ilin yanvar-sentyabr aylarında bərpa olunan enerji mənbələrindən (BEM), o cümlədən su elektrik stansiyalarından (SES) elektrik enerjisi istehsalı 1,684 milyard kilovatt/saatı ötüb.

Axar.az xəbər verir ki, bu barədə Azərbaycanın energetika naziri Pərviz Şahbazov özünün X hesabında yazıb.

Paylaşımda vurğulanıb ki, hesabat dövründə SES-lər tərəfindən 1,417 milyard kilovatt/saat, külək elektrik stansiyaları (KES) tərəfindən 44,6 milyon kilovatt/saat, günəş elektrik stansiyaları (GES) tərəfindən 53,2 milyon kilovatt/saat, bərk məişət tullantılarının yandırılması zavodunda isə 169,2 milyon kilovatt/saat elektrik enerjisi hasil olunub.

Qeyd edək ki, hesabat dövründə Azərbaycanda ümumi elektrik enerjisi istehsalında BEM sektorunun payı 7,81 faiz olub.

Bütünlükdə Azərbaycanda elektrik enerjisi istehsalı 21,538 milyard kilovatt/saat olmaqla hesabat dövründə Azərbaycandan elektrik enerjisi ixracı 1,841 milyard kilovatt/saat, idxal isə 179,6 milyon kilovatt/saat təşkil edib.