Əgər vətəndaşın ödəmə qabiliyyəti varsa, yaşından, peşəsindən asılı olmayaraq, kredit almaq hüququ olmalıdır.

Axar.az xəbər verir ki, bu haqda iqtisadçı alim Vüqar Bayramov yazıb. Ekspert Maliyyə Bazarlarına Nəzarət Palatasının təqaüdçülərə kreditlərin verilməsini qadağan etməsinə münasibət bildirib:

"Əgər vətəndaşın ödəmə qabiliyyəti varsa, yaşından, peşəsindən asılı olmayaraq kredit almaq hüququ olmalıdır. Eyni zamanda, müştərinin ödəmə qabiliyyətini bank qiymətləndirməlidir. Təqaüdçü yüksək pensiya alırsa və hətta öz həyatını sığorta etdirib, kedit üçün müraciət edirsə, bank nə üçün ona mənfi cavab verməlidir? Yaş heç zaman meyar ola bilməz, əsas kriteriya ödəmə qabiliyyəti olmalıdır. Həmçinin, beynəlxalq praktikada konkret əhali qruplarına qadağaların tətbiq edilməsi diskriminasiya kimi qiymətləndirilir. Yaş qruplarına görə kredit verilməsinə məhdudiyyətlər tətbiq etməklə problemli kredit məsələsini həll etmək mümkün deyil. Bunun üçün daha kompleks tədbirlərin həyata keçirilməsinə ehtiyac var".

Qeyd edək ki, aprelin 21-də Maliyyə Bazarlarına Nəzarət Palatası kredit təşkilatları tərəfindən pensiyaçılara kreditlərin verilməsinin dayandırılması barədə qərar qəbul edib.