Amerikalı aktyor Corc Kluni ilə evlənərək beynəlxalq səviyyədə məşhurluq qazanan vəkil Amal Kluninin işlədiyi hüquq bürosu keçmiş Liviya lideri Müəmmər Qəzzafinin oğlu Seyf əl-İslamı edamdan xilas etməyə çalışır.

Axar.az xəbər verir ki, Deili Meil-in yaydığı məlumatda Amal Kluni ilə həmkarı Con Consun Seyf əl-İslam Qəzzafi ilə keçmiş kəşfiyyat rəhbəri Abdullah əs-Sinusini edamdan xilas etmək üçün müdafiə hazırlaşdığı bildirilir.

Kluni və həmkarı edam cəzasına məhkum edilən cinayətkarların "üsullara uyğun şəkildə mühakimə edilmədiyini və Laheydəki Beynəlxalq Məhkəmədə yenidən hakim qarşısına çıxmalı olduqlarını" söyləyir. Laheydəki məhkəmə heç bir günahkara edam cəzası vermir.

Xatırladaq ki, Seyf əl-İslam Qəzzafi və keçmiş kəşfiyyat rəhbəri Abdullah əs-Sinusi keçən həftə Tripolidəki məhkəmədə Liviya xalqına qarşı insanlıq cinayəti işlədikləri səbəbindən edam cəzasına məhkum ediliblər.