Ana səhifə Kult |
Türkiyə mediası iki oğlu ilə könüllü olaraq döyüşlərə qatılan və şəhidlik zirvəsinə ucalan, Birinci Qarabağ savaşında da iştirak etmiş Müşfiq Abbasovla bağlı xəbər paylaşıb.
Tanınmış döyüşçü və vətənpərvər, ağdamlı Müşfiq Abbasov həm də komediya ssenaristi kimi təqdim edilib və beləliklə, türkiyəli həmkarlarımız “Bu şəhərdə” komandasının rəhbəri Müşfiq Abbasovla qazi Müşfiq Abbasovun eyni şəxs olduğunu düşünüblər.
Məsələ ilə bağlı Kult.az-a açıqlama verən ssenarist Müşfiq Abbasov bildirib ki, şəhidlik məqamına yüksəlmək onun üçün də fəxr olardı və sözügedən yanlışlıq heç bir narahatlığa səbəb olmayıb:
“Qazi Müşfiq Abbasov haqda əvvəldən də məlumatlıydım, onun şəhid olduğunu da oxudum. Allah ona rəhmət eləsin. Hamımız öləcəyik – bir gün tez, bir gün gec. Ancaq hər kişinin işi deyil dünyadan şəhid kimi getsin. Allah mənə də şəhid olmağı qismət eləsin. Ola bilər ki, Türkiyə mətbuatı şəhidin ad-soyadını internetdə axtarışa verən zaman mənim haqqımda məlumat tapıb. Mənim də iki oğlum var. Yəni şəhid qardaşım-adaşımla oxşarlıqlarımız çoxdur. Sadəcə, o artıq məndən üstün elə bir məqama qalxıb ki, özümü ona bənzədə bilmərəm.
Mən də ehtiyatda olan zabitəm və hərbi komissarlıqdan çağırış gözləyirəm”.
Qeyd edək ki, tanınmış döyüçşçü Müşfiq Abbasovun oğlanları hazırda könüllü olaraq torpaqlarımızın azad edilməsi əməliyyatlarında iştirak edirlər.
Tarix
2020.10.08 / 13:23
|
Müəllif
Nərmin Əkbərli
|